Brobergimut isornartorsiuisoqareersoq: Siumut naalakkersuisuutitaqaqqilernissamut tunuarsimaanngitsoq

Inuit Ataqatigiit naalakkersuisoqatigilernissaanut Siumumiit ammaffigineqarpoq.

Nunanut allanut naalakkersuisup, Pele Brobergip, ulluni pingasuni oqallitsitsingaatsiareersoq, Siumumi siulittaasoq Erik Jensen KNR-imut taama oqarpoq.

- Naalakkersuisut akunnerminni qanoq aaqqiisoqarniarnersoq utaqqisariaqarparput, Erik Jensen oqarpoq.  

- Apeqqutigineqartoq kingusiinaq akissuteqarfigineqassajunnarsivoq, massakkuugallartorli eqqartorneqarsinnaanani.

Eqqartorneqartoq danskit aviisianit Berlingskemit sapaatiummat saqqummiunneqarmat aallartippoq. Tassanimi Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqannginnerannik oqaaseqarmat. Kalaallinit kingoqqisut kisimi taasisitsinermi peqataasoqarsinnaaneranik, Pele Broberg Berlingskemut oqaaseqarmat.

- Thailandimiut, Danmarkimeersut, tuluit, Frankrigimeersut, Spaniamiut, allalluunniit nunatsinni najugallit nunatta namminiilivinnissaanut taasisitsinermi peqataanissamut pisinnaatitaaffeqanngitsut ersarippoq. Tassa naggueqatigiit inuit. Nuussimasutut qanoq misigisimaneq isumaqarnerlu taasinissap oqallisigineqarnissaani matumani pingaaruteqanngillat, taanna oqarpoq.

Sooruna tamanna eqqartorneqartariaqartoq? Sooruna Kalaallit Nunaanni najugaqartut tamarmik taasisitsinermi peqataatinneqarsinnaanngitsut?

- Nunatsinnimmi nunasiaateqarsimasut nunatsinniiginnarusunnerlutik taasisussaanngillat, Broberg Berlingskemut oqarpoq.

Siumut Pele Broberg isumaqatiginngilaat

Oqariartuullu tamanna Siumumiit isumaqatigineqanngilluinnarpoq: 

- Tassami naalagaaffiit peqatigiit inatsisaani allassimasut aammalu Namminersorneq pillugu inatsimmi allassimasut aallaavigalugit, nunatsinni najugaqartut taakkuupput taasissussaatitaasut, Erik Jensen KNR-imut oqarpoq.

- Uagut Siumuminngaaniit inuiaat kalaallit ataatsimoortut pilersinneqarnissaanik oqariartuuteqarluta akissuteqarsimavugut (aaqq. Berlingskemut). Isumaqaratta avissaartuunissaq aqqutissaanngitsoq, kisiannili ataatsimoorluta inuiaqatigiit kalaallit tunngavissinneqarnissaat pitsaassumillu aqqutissiorneqarnissaat taanna pingaarnerpaarpaajusoq, Erik Jensen oqarpoq.

AAMMA ATUARUK Atassut: Ikke tillid til Pele Broberg

- Oqaatigissavara naalakkersuisooqqatigiit akunnerminni avissaartuunnerat, taavalu taassumap kingunerisaanik inuiaqatigiinni oqallinnerujussuaq.  Avissaartuunneq massakkut pilersoq ilungersunartutut Siumuminngaaniit isigaarput. 

Brobergip apersorneqarnerata kingunerisaanik naalakkersuisut akunneranni avissaartuutaasoq Siumumiit kisimi isumaqanngillat. Kaj Kleist aamma taama isumaqarpoq. Namminersornerullutik Oqartussani Namminersorlutillu Oqartussani Kalaallit Nunaanni politikkimi nuimasunut qanimut ukiorpassuarni atorfilittatut malinnaanikuuvoq.

Naleqqakkut naalakkersuisuutitaqarunnaassagaluarpata, IA allamik periarfissaqanngilaq taamaallaat Siumukkut suleqatiginissaanut, Kaj Kleist naliliivoq. 

Pele Broberg apersorneqarusunngitsoq

Naleraq naalakkersuisuutitaqaanarusuttoq, Naleqqakkut oqaaseqartittagaat Jens Napaattooq KNR-imut ataasinngormat oqarpoq.

Atassummiit Pele Broberg naalakkersuisuujunnaarnissaanut Múte B. Egedemut ataasinngormat piumasaqarput. Pele Brobergillu kina taasisinnaanissamut oqariartuutaa Demokraatininngaaniit "ajorluinnartutut" nalilerneqarpoq. 

Taasisinnaanissamut oqariartuummut Naalakkersuisut siulittaasuata Múte B. Egede isumaqataannginnerarluni siullermeerluni sapaatiummat oqariartuuteqarpoq.

AAMMA ATUARUK Berlingske: Pele Broberg kukkusumik issuanngilarput

Kalaallit kisimi taasisinnaanissaanut tunngasumik Pele Broberg nammineerluni ippassaq oqaaseqarpoq – Kalaallit Nunaanni najugallit tamarmik taasisinnaatitaanerat Facebookimi allappaa. Berlingskemuna apersuinermini "issuarnerliorneranut" tunngaveqartoq, taanna allappoq.

Tamanna Berlingskep KNR-imut eqqunnginerarpaa. Apersuineq tamaat Pele Brobergip oqarneratuut immiunneqarlunilu anillatsinneqareerpoq,  nunanut allanut tunngasunut aaqqissuisoq Birgitte Borup oqarpoq.

Pele Broberg apersorneqarnissaminut ippassaq itigartitsivoq. Facebookimili nammineerluni allassimasaminut innersuusilluni.