Iranimi naakkittaatsuliorneq tuluit ministeriunerannit assuarineqarpoq

Tuluttut Iranmiusullu innuttaassuseqartoq Alireza Akbarip Iranimi pillaatitut toqutaanera Tuluit Nunaannit assuarineqarpoq.

- Tuluttut Iranimiusullu innutaassuseqartup Alireza Akbarip Iranimi pillaatitut toqutaanera annilaarutigaara, Tuluit Nunaanni ministeriuneq Rishi Sunak, attaveqatigiittarfimmi Tweeterimi taama allappoq.

Iranimi inatsiseqarnermut aqutsisoqarfiata nalunaarutigaa, Iranimi illersornissamut ministerimut tullersortaasimasoq Alireza Akbari, Tuluit Nunaannut kilitsissiatut unnerluutigineqarluni pillaatitut toqutaasimasoq.

Iranimiut iliuuserisaat naakkittaatsuliornerusoq Iranilu oqaatsit sakkortunerpaat atorlugit assuarineqartariaqartoq, Tuluit Nunaani nunanut allanut tunngasunut ministeri James Cleverly oqarpoq.

Akbarip toqutassanngorlugu eqqartuunneqarnera Tuluit Nunaani oqartussaasut Iranimiunut allanngortinniaraluarpaat, iperaganissaalu piumasarisimagaluarlugu.

Parnaarussivimmi naalliutinneqartoq 

Tuluit Nunaani tusagassiorfiup BBC-ip persiami immikkoortortaqarfiani immiussami nassiunneqarsimasumi tassani tusaaneqarsinnaavoq Alireza Akbari anniartitaanini peqquserluttuliorsimaneragaaninilu nassuerutigissagai pinngitsaalillugu oqartinniarneqarnera.

Immiussami Akbari oqaluttuarpoq Iranimi isertortortumik paasiniaasartunit akunnerit 3500-it sinnerlugit killisiorneqarsimalluni naalliutsinneqarsimallunilu.

- Timikkut eqqarsartaatsikkullu periutsit atorlugit piumassusera nakkarsarpaat, silaarutingajatsittarlunga pinngitsaalillungalu kissaatigisisaminnik iliuuseqartittarlunga.

Akbari oqarpoq Iran Tuluit Nunaannut akiniiaaniarsaraluni Akbari toqutassanngorlugu eqqartuukkaat.