Tuluit coronavirusimut akiuussutissamik nunani killerni siullersaallutik kapitissinnaalissasut
Nakorsaasiorfissuit Pfizer BioNtechilu coronavirusimut akiuussutissaliaat Tuluit Nunaanni immikkut ittumik akuerineqarpoq. Akiuussutissaq taamaasilluni sapaatit-akunnerata tulliani atorneqarsinnaalissaaq.
Tuluit naalakkersuisuisa tusagassiutinut tamanna nalunaarutigaat.
Nakorsaat pineqartoq atorneqarnissamut immikkut ittumik akuerisaavoq, assersuutigalugu nakorsaatit EU-mi akuerineqartarnerannut naleqqiullugu periutsit allat atorneqarlutik. Nakorsaatit EU-mit, taamalu Danmarkimi nunatsinnilu atorneqarsinnaanissamut akuerineqarnissaat pillugu periutsit nalinginnaasut atornagit immikkut ittumik akuersisoqarpoq.
Utoqqaat illuini najugallit, peqqinnissaqarfimmi utoqqaallu illuini sulisut taavalu utoqqaat inuillu allat coronavirusimik napparsimalersinnaanissamut qaninnerusut akiuussutissamik kapineqarnissamut siullertut neqeroorfigineqassapput.
AAMMA ATUARUK Peqqissutsimut ministeri: Tamat coronamut akiuussutissamik neqeroorfigineqassapput
Pfizerip nakorsaataata EU-mi atorneqarsinnaasutut akuerineqarnissaa pillugu Pfizer maanna qinnuteqarpoq.
Europami nakorsaatinut aqutsisoqarfik EMA tamanna pillugu decembarip ulluisa 29-anni aalajangiiumaartoq EMA-p marlunngornermi oqaatigaa.
Danmarkimi innuttaasut akornanni siulliit akiuussutissamik aappaagu januaarimi kapitissinnaanissaat ilimagineqarpoq.
Akiuussutissap nunatsinni piaarnerpaamik neqeroorutigineqarsinnaanissaa, Danmarkip peqqissutsimut ministeriata Magnus Heunickep tusagassiortunik qanittukkut katersortitsinermi aamma neriorsuutigaa.
