Vittus: Brexit uatsinnut sunniuteqanngitsoornavianngilaq

Tuluit Nunaata siunissami sorusunnera paasinarsimmat pissusissamisoorpoq, ministeriunerup Theresa Mayip marlunngornermi piumasaqaatini saqqummiuppai. Europamiut peqatigiiffiannit nunartik anippat isumaqatigiinniutigerusutani sorsuutigerusutanilu saqqummiuppai.

Tuluit Nunaat tassaavoq Kalaallit Nunaata qalerualinnik tunisiffiginerpaasartagaanni annerit tulliat, Nunatta avammut tunisartagaanik annertuunik pisisartut, taamaattumik naalakkersuisut ulapittariaqarput. Naalakkersuisut tamanna pissutigalugu ineriartorneq qanittuaqqamik malinnaaffigaat suleqatigiissitaliorsimallutillu danskinit peqataaffigineqartunik.

- Siunissami avammut tunisat pillugit Tuluit Nunaannut EU-p avataaniittumut pingaaruteqartut suunersut paasiniartariaqarpavut.

AAMMA ATUARUK Tuluit Nunaat EU-mut ilaasortaajunnaassappat Nunatsinnut sunniuteqarsinnaasoq

Erseqqissarpaa EU-p Tuluit Nunaatalu akornanni isumaqatigiinniarnerit ajornakusuussasut, Kalaallit Nunaatalu avammut tunisartagaanut sunniuteqarnerlukkumaartut, Qujaukitsup erseqqissarpaa.

- Qanorluunniit inerneqaraluarpat Tuluit Nunaannut allatut isumaqatigiinniartalissaagut, taanna oqarpoq nangillunilu:

- Imaappoq kalaallit tunisassiaat pitsaanerpaamik atugassaqartittariaqarpavut.

Kalaallilli tunisaqarnissamut periarfissaat maannamut killeqarsimapput. Nunanut allanut tunngasunut naalakkersuisoqarfik naapertorlugu Tuluit Nunaat nunanut allanut isumaqatigiinniaqqusaanngilaq, EU-mit aninissamut piumasaqaatit inissinneqartinnagit.