Spaniap ministeriunera allakkanik qaartartumeerutinik nassiussarsisimasoq
Allakkanik qaartartumeerutinik kingullermik sapaatit akunnerata siuliani sisamanngornermi nassiussarsisimallutik, Spaniami ministeriunerup Pedro Sanchezip allattoqarfiata uppernarsarpaa.
Sisamanngornermi nassiussarsiarisaanni qaartartup qaartartoq alla Ukrainep Spaniami aallartitaqarfiata sapaatit akunnerata siuliani pingasunngornermi nassiussarsiarisaani nassarineqartoq asserluinnaraa.
Allakkani qaartartumeerutini Sanchezimut nassiussat upalungaarsarluni qaartinneqarput.
Tassa allakkat qaartartumeerutit maannamut nassaarineqartut katillutik tallimaapput, kikkullu taakkuninnga nassitsisuusimanersut ilisimaneqanngilaq. Spaniamili sumiiffimmiit ataatsimiit sumiiffinniluunniit arlalinniit nassiunneqarsimannguatsiartut, Spaniap naalakkersuisui ilisimatitsipput.
Allakkanik qaartartumeerutinik nassitsisoqartarsimanera peqqarniisaarniarnertut isigalugu Spaniami eqqartuussiviit ilaanni misissorneqaleruttorpoq.
AAMMA ATUARUK Spaniami illoqarfeeraq Ukrainemik ateqalersoq
Allakkanik pasinapiluttunik nassiussarsisimallutik, Spaniap illersornissamut ministereqarfia sisamanngornermi aamma nalunaarpoq. Nassiussarsiaalu allakkat qaartartumeerutit allat siusinnerusukkut nassaarineqartut sisamaasut asserluinnaannik imaqarsimapput.
Nassiussamik allamik aamma qaartartumik imalimmik nassaartoqarsimasoq, Spaniami politiit sisamanngornermi siusinnerusukkut ilisimatitsissutigaat.
Allakkanik qaartartumeerutinik marlunnik sapaatit akunnerata siuliani pingasunngornermi nassaartoqarpoq. Taakkunannga siulleq Ukrainep Madridimi aallartitaqarfianut aappaalu Spaniap avannaani illoqarfimmi Zaragozami sakkussiorfimmut nassiunneqarsimapput.
Taakkunannga siulleq Ukrainep Spaniami aallartitaqarfiani sulisumit ukrainemiuusumit passunneqartilluni qaarpoq. Sulisoq taanna aqqunartitilaarpoq.
Allanik qaartartumeerutinik nassaartoqarnerata kingunerisaanik pisortat allattoqarfiini aallartitaqarfinnilu isumannaallisaaniarnerulertoqassasoq, ministeriunerup allattoqarfia ilisimatitsivoq.
