Spaniami illoqarfeeraq Ukrainemik ateqalersoq

Spaniap kujasissuani illoqarfeeraq Ukrainemik ateqalersimavoq.

Nunamik taassuminnga sorsunnermit eqqorneqarnerlussimaqisumik tapersersuinertik takutinniarlugu Spaniami illoqarfeeraq taama aalajangerpoq.

Illoqarfeeraq taanna Fuentes de Andalucíamik siornatigut taaguuteqarpoq. Illoqarfeeqqamulli apuutilernermui kaajallattariakkooraanni takuneqarsinnaavoq Funetes de Andalucíamik taaguuteqarani illoqarfeeraq Ukrainemik taaguuteqalersimasoq.

Ukrainep erfalasuata qalipaatai tungujortoq sungaartorlu illoqarfeeqqap taaguutaata nutaap allagartaata saniani maanna aamma takussaalerput.

Illoqarfeeqqami alianaatsumi illut aamma qalipanneqarlutillu kusassarneqarsimapput, aqqusernillu Ukrainemi illoqarfiit ilaannut aamma atsiunneqarsimallutik, soorlu Kyiv, Odesa Mariupolilu.

Ukrainemi pisunut alianaqisunut eqqaasitsiniartoqartoq illoqarfeeqqap borgmesteriata Francisco Martinezip oqaatigaa.

Iliuutsillu ajunngisaarneruinnaanngitsut aamma ilisimatitsissutigaa.

Tassanimi innuttaasut aningaasanik 3500 Euronik, imaluunniit 26.000 koruunit missaannik, ullut marluk ingerlaneranni katersisimapput.

Aningaasat taakku qimaasut illoqarfeeqqami tassani najugaqarfissaannut atorneqassapput, Ukrainemiimmi qimaasut 25-t angullugit najugaqartinneqarnissaat pilersaarutaavoq.

Illoqarfeeraq pineqartoq illoqarfissuarmit Sevillamit kangimut inissisimavoq, 7100-llu missaannik innuttaqarluni.