Atuagaq atuffassissut: Trumpip nunatsinnik pisinialersaarnera tusarnaarneqarsinnaanngortoq
Danskip tusagassiortup Martin Breumip atuakkiaa ”Grønland og den amerikanske forbindelse”, Amerikap præsidenterisimasaata Donald Trumpip nunatsinnik pisiumaneranut tunngasoq kalaallisut saqqummerpoq.
Amerikap præsidenterisimasaata Donald Trumpip nunarput pisiarinialeraluallarmagu ministeriunerup Mette Frederiksenimit augustimi 2019-imi itigartippaa.
- Kim Kielsenip suaarutigereerpaa Kalaallit Nunaat nioqqutaanngitsoq taava tassa, oqallinnerluunniit pisariaqanngilaq, Mette Frederiksen taamani oqarpoq. Trumpip akissut iluarinngilluinnarpaa, pisortatigoortumillu Danmarkimut tikeraarnissaraluani kinguninngua unitsillugu.
AAMMA ATUARUK Mette Frederiksenip oqaaseqaataa "ajuippoq"
Pisoq tusagassiortup atuakkiortullu Martin Breumip atuakkatut ukiarmi saqqummersippaa, qulequtalimmik: ”Grønland og den amerikanske forbindelse”.
Tusarnaarneqarsinnaalertoq
Atuagaq kalaallisut nutserneqarpoq qulequtserlugu: ”Taamani Trumpip Kalaallit Nunaat pisiarinialeraluallarmagu”. Kalaallisuunngortinnerali atuakkatut suli saqqumminngikkaluartoq immiunneqarnera saqqummerpoq, tusagassiortumit maannalu Inatsisartuni ilaasortaasumit Mariia Simonsenimit atuarneqartumik.
- Atuakkamik tassannga atuartut attaveqarfigerusuppakka qanorluunniit oqaaseqartuussagaluarpata, taamaammanuna pingaartilluinnariga atuakkap kalaallisut aamma nutserneqarnissaa. Tamannalu iluatsimmat nuannaarutigingaarpara. Maannalu kalaallisuinnaq tusarnaarusuttunut tusarnaarneqarsinnaalerpoq, Martin Breum oqarpoq.
AAMMA ATUARUK Donald Trumpip Kalaallit Nunaat pisiariniarlugu takorlooraa
Taannami isumaqanngilaq Donald Trumpip nunatsinnik pisiarinninniarluni isumassarsinera silaannarminngaanniit asuli takkutinngitsoq.
- Taamatullu eqqarsaateqalernerminut arlalippassuit tunngavigai, tassalu atuakkap matuma qiternga. Atuakkamilu ersersinniarsaraara præsidentip taamatut oqarneratigut amerikamiut eqqarsariaasaat qanoq ililluni siunertaqariataarsinnaanersoq, Martin Breum oqarpoq.
Breum: Kalaallit Nunaat Ruslandimut eqqornaveeqqutaasoq
Kalaallit Nunaata inissisimanera Amerikamut iluaqutaasoq tusagassiortoq oqarpoq.
- Eqqaamassavarpummi Kalaallit Nunaat nunarsuarmi inissisimanerata ilusaa eqqarsaatigalugu Amerikamut atammat. Kalaallit Nunaatalu inissisimarnga allaanngilaq Amerikamut paarsisutut ittoq Qalasersuullu illuatungaaniittunut Amerikap akeraanut, pingaartumik Ruslandimut eqqornaveeqqutaasoq. Ullumikkullu Ukrainemut sorsuttoqarnerani tamatuma pingaaruteqassusaa suli ersernerulerporlusooq, Martin Breum oqarpoq.
AAMMA ATUARUK Uppernarsarneqartoq: Trump nunatta pisiarinissaa pillugu misissuivoq
Atuakkap kalaallisut atuffassissutigineqarnera qarasaasiakkut aasinnaavat TALES-ikkoorlugu, taannalu 74 koruunimik akiliillutit aasinnaavat.
