Boris Johnsonip naalakkersuisoqatai ajornartoortut
Boris Johnsonip Tuluit Nunaanni ministeriunerunera naalersoq Tuluit Nunaanni aviisit arlallit ilimagaat.
Naalakkersuisoqatigiinni ministerit katillugit sisamat tunuarniuteqareersullu taama naliliisoqarpoq.
Aningaasaqarnermut ministeri Rishi Sunak, peqqissutsimullu ministeri Sajod Javid Boris Johnson akerliuffiginiarlugu ministeritut ippassaq marlunngornermi unnukkut tunuarput.
Meeqqanut ilaqutariinnullu ministerip Will Quincep ministeritut tunuarniuteqarnini taava pingasunngornermi ullaakkut nalunaarutigaa. Atuarfeqarfinnilu sulinerup ataqatigiissaarneqarnissaanut ministeri Robin Walker maanna aamma tunuarniuteqarpoq.
Konservatiivit sinnerlugit inatsisartunut ilaasortap Chris Pincherip angutinut marlunnut imerniartarfiit ilaanni kinguaassiutitigut innimiilliorsimasutut pasineqarneranut atatillugu suliamut Boris Johnsonip iliuuserisai taakku ilaatigut isornartorsiorpaat.
Pincherip kinguaasssiutitigut innimiilliorsimanerarneqarneranut suliaqartoqarnera Johnsonip ilisimagaluaraa Pincher naalakkersuisoqatigiinni qaffatsinneqarpoq. Pincherili kinguninngua tunuarpoq utoqqatsissuteqarlunilu.
Boris Johnson suliamut atatillugu iliuuserisani kingorna utoqqatsissutigai, ministerilli ilaat marluk tamanna naammaginngilaat.
Boris Johnsonip mamianartuliai amerlavallaartut taakku isumaqarput naalakkersuisoqatigiinniikkunnaarniarlutillu.
Coronavirusip ajornartoortitsinerata nalaani ministeriunerup 10 Downing Streetimi najugaanni 2020-mi katerittoqartarsimaneranut atatillugu mamianartuliat taakkununnga ilaapput. Tuluit Nunaanni inuiaqatigiinni taamanikkut matusinerpassuaqarpoq.
Johnsonip ministeriunerunera tamaanga killeqartoq aviisip The Timesip pingasunngornermi allaaseraa, partiiminilu innuttaasuniillu tatigineqarunnaarnera eqqarsaatigalugu ministeriunertut ataannarnissani eqqarsaatigiguniuk Johnson kukkussasoq oqaatigalugu.
