Boris Johnsonip akisussaaffik tamaat tigugaa: Ilinniutigaara

Tuluit Nunaanni politikkikkut mamianartuliortoqarsimaneranut akisussaaffik tamaat tigugini, tuluit ministeriunerat Boris Johnson tuluit inatsisartuini pingasunngornermi oqarpoq. Politikkikkut mamianartuliornerit taakkua partygatemik taaguuserneqarput.

Nalunaarusiaq coronavirusip tuniluuteruttornerani malittarisassanik unioqqutitsilluni tuluit naalakkersuisuisa allaffeqarfianni fiistertoqartarsimaneranut tunngasoq ullumi pingasunngornermi saqqummerpoq. Tuluit Nunaannilu naalakkersuinikkut qullersat fiistertoqartarsimaneranut akisussaatinneqarput.

- Akisussaasuuninni taamani pisunut tamanut imminut akisussaatippunga, Johnson oqarpoq.

Mamianartuliornerit pillugit nalunaarusiami saqqummiunneqartut ilaat uissuummissutigigini pisullu ilaanni aamma najuussimanani, taassuma ilanngullugu oqaatigaa.

- Malittarisassanik unioqqutitsinerit fiistini taakkunani najuutillatsiarninni pinngillat. Malittarisassanilli najuukkunnaareerninni allaffeqarfimmiinnginninniluunniit unioqqutitsisoqartarsimasoq erserpoq, tuluit ministeriunerat ullumi pingasunngornermi oqarpoq.

AAMMA ATUARUK Ministeriuneq festertertereersorlu isornartorsiorneqarpoq

Aamma utoqqatsillunilu pisut ilinniutigisimagini, taassuma aamma oqaatigaa.

2020-mi juunip ulluisa 18-ianni fiistertoqarsimasoq, atorfilittat ilaata Sue Grayip nalunaarutiliaani ilaatigut allaqqavoq. Tuluit Nunaanni taamanikkut killilersuisoqarpoq.

- Inuit ilaat aalakoornartulimmik taamanikkut imigassartutuussimapput. Taakkunannga ataaseq inuummarliorpoq marlullu allat paggillatsiartunut akuupput, Sue Gray allappoq.

Boris Johnson tamatumunnga atatillugu eqqaaneqanngilaq. Juunilli ulluisa 19-ianni tassa inuuimmini fiistertuni najuussimavoq.

Boris Johnson tamanna pillugu ullumi pingasunngornermi utoqqatseqqippoq.