Borgmesterip tullersortaata naalakkersuisut Tasiilami erngup nukinganik innaallagissiorfik pillugu isornartorsiorai
Naalakkersuisut Nukissiorfiit suleqatigalugit Tasiilami erngup nukinganik pilersuineq pillugu paasissutissiipput.
Tamanna erngup nukinganik innaallagissiorfiup artorsarnera pillugu KNR-ip ilanngutassiaanik kingullermik tunngaveqarpoq.
Nukissiuutinik pisariaqartitsisoqarnerulernera erngullu piffissami kingullermi annikinnera pissutigalugu imermik pilersuineq ukiuunerani qaammatini dieselimik motoritortumik ilalerneqartariaqarnera tassani allaaserineqarpoq.
Ingerlatsinermi pisortap Tasiilami innaallagissamik atuineq ineriartortinneqassappat ajornartoornermi innaallagissiorfimmik nutaamik imaluunniit erngup nukinganik innaallagissiorfik ukiut marluk tallimallu ingerlanerani allilerneqartariaqartoq naliliivoq.
Innaallagissamik pilersuinerup piffissami matumani qamittoornissaanut aarlerinartoqanngitsoq, Nukissiuutinut naalakkersuisoq, Jørgen Rosbach (D) tusagassiuutinut nalunaarummi paasissutissiivoq.
- Naalakkersuisut innaallagissamik pilersuinermut isumannaallisaanermut tunngasut nunatsinni ineriartornerat qanimut malinnaaffigaat, nunarpullu tamaat nukissamik ataavartumik isumannaatsumillu pilersuinerup qulakkeerneqarnissaa siunertaralugu Nukissiorfiit ingerlaavartumik attaveqaqatigalugu.
Borgmesterip tullersortaa isornartorsiuisoq
Kommuneqarfik Sermersuumi borgmesterip tullersortaa Tasiilameersoq, Egon Poulsen (S) Facebookikkut isornartorsiuivoq.
Taassuma Naalakkersuisut naammaginartumik akissuteqannginnerarlugit isornartorsiorpai.
- Akissuteqarnerminni ullumikkut pissutsit kisiisa aallaavigaat, illoqarfittali ineriartoqqinnissaanut pilersaarummik tikkuussaqarnatik, Egon Poulsen allappoq.
- Nukissiorfipput illoqarfitta ineriartoqqinnissaanut annertuumik killiliivoq, tamannalu aaqqiivigineqartariaqarpoq taannaana nilliaatigigipput.
