- Kisimiivikkatta: Borgmesterip sakkutooqarnerunissaa ammaappaa
Malene Vahl Rasmussen (D) allaffimminiit igalaakkut tikkuarpoq.
Igalaamit silammut qiviaraanni illoqarfik eqqissisimasoq takuneqarsinnaavoq ataasinngornermilu mininera suli eqqissisimatitsinerusutut ippoq.
- Ataatsimiinnitsinni oqaloqatigiillutalu pilersaarusiorsinnaavugut igalaakkulli silammut qiviarutta susoqanngitsoq. Sakkutooqanngitsoq. Isumannaallisaasoqanngitsoq. Immitsinnut illersorsinnaanata, Malene Vahl januaarimi misigisaminik oqaluttuarpoq.
Kommune Kujallermi kommunimi pisortaaneq, Randi Vestergaard Evaldsen ilaliivoq:
- Radio fjernsyniluunniit ikikkaanni annilaangasorpassuit. Assigiinngitsorujussuarnik atugaqarluta.
Donald Trump nunarput tiguarniarlugu januaarimi sioorasaarivoq. Danmark Europami suleqatigisani peqatigalugit akiuunnissamut piareersarpoq attaveqaasersuutillu aserortissallugit pilersaarusiorluni. Nuummiut ajornerpaamik pisoqarnissaanut piareersarput.
Qaqortumili sakkutooqarnikkut piareersartoqarneranik takussaasoqanngilaq.
Taama pisoqarnera borgmesterip kujataani sakkutooqarnissaanut isumaanik allanngortitsivoq.
- Kujataani sakkutooqarnerulernissaa ammaffigaara tassami nunatsinnut isaaffissatut siulliuvugut, Malene Vahl Rasmussen oqarpoq.
Namminerlu immikkoortortaqarfimminit Amerikamiut præsidentiata kissaateqarnera aamma erseqqissaatigaa.
Qimarnguiffiit sakkutooqarnerlu
Malene Vahl Rasmussenip Randi Vestergaard Evaldsenillu kommunimi ajornerpaamik pisoqarsinnaaneranut januaarimi piareersarsimanertik oqaluttuaraat.
Saniatigullu inuit pissusilersorput soorlu susoqanngitsoq.
- Qanoq nerisassaqartiginerluta, imissaqartiginerluta, nunaqarfinni qanoq imermik pissarsisoqariaannaanersoq, nunaqarfiit tamarmik ajornartoornermi innaallagissamik pilersuuteqarnersut, qaammataasakkut attavilimmik sumi tamaani oqarasuaateqarnersoq ajoquteqannginnersullu ataatsimiinnitsinni eqqartorpagut, Malene Vahl oqarpoq.
- Innaallagiaaruppat kiassaatillu qamippata qanoq iliussaagut. Sumi qimarnguiffiliussaagut saassussisoqassappallu sumi katersuutissaagut.
Arnat marluk maannakkut saaffiginnittarfimmiipput. Tassa kommunimi isumannaallisaaneq, Randi Vestergaard Evaldsen quiasaarpalulluni oqarpoq.
Quiasaaraluarlunili ilungersorpoq.
- Sakkutooqarneq isumannaatsuunitsinnut suliniutaassagaluarpoq, Malene Vahl Rasmussen oqarpoq.
- Imartatsinni nakkutilliisoqarnerulerlunilu pisoqarnerulerpoq taamaattumik maani sakkutooqarnissaa pisariaqartipparput.
Trumpip nunatta kujataanik kissaateqangaatsiarnera
Nunatta kujataani aatsitassanik qaqutigoortoqarfiusumi sakkutooqarnerunissaata pisariaqarnera kommunip immikkut maluginiagaasa ilagaat.
- Nunatsinni upalungaarsimanerujussuaq Nuummiippoq, Nuummili aatsitassarsiortoqanngilaq. Tamannaluuna Donald Trumpip atorfilittaatalu eqqartugaat. Aatsitassarsiorneq maaniippoq kisiannili illersorneqarusunngilaq, Randi Vestergaard Evaldsen oqarpoq.
Malene Vahl Rasmussen januaarip qaammataani kiserliungaatsiartutut misigisimanerarpoq:
- Kisimiivikkatta. Sorsuutit maaniinngillat. Soqanngivippoq. Kujataata tiguarnissaa ajornannginneerarsuussagaluarpoq. Aatsitassat qaqutigoortut tamarmik maaniipput Kuannersuillu kisiat pinngilara.
Kuultisiorfiup, Nalunap saniatigut grafitinik piiaavik Amitsoq EU-mi suliniutitut periusissiatigut pingaaruteqartutut toqqarneqartoq, aamma misissuiffigineqarpoq.
Tamatuma saniatigut Tanbreezip aatsitassanik qaqutigoortunik piiaaffiginiagaa ukioq manna aamma suliaqarfigineqangaatsiartoq, Malene Vahl Rasmussen oqarpoq.
- Tassanngaannaq isumaqalernarpoq Amerikamiut kujataani aatsitassat perusuinnarlugit nunarput perusukkaa, Malene Vahl Rasmussen oqarpoq.
Narsarsuarmi sakkutooqarfik aamma umiarsualivik
Malene Vahl Rasmussenip sakkutooqalernissaanut allaffimminiinnaq piareersimasoqannginnerarpaa.
Taassuma oqarnera naapertorlugu Narsarsuarmi aamma ammaffigineqarnerulersimavoq. Tassani ilaatigut Amerikamiut sakkutooqarfittaarnissamut soqutiginnimmata. Danmarkimiit sakkutuujusinnaapput, Nato Amerikamiulluunniit, borgmesteri erseqqissaavoq.
- Narsarsuarmi sakkutooqarfeqalernissaa ammaffigineqartorujussuuvoq. (Narsarsuarmi innuttaasut, aaqq.) oqalupput: Sooruna Narsarsuaq sakkutooqarfissatut piukkunnarnerpaaq atunngilisiuk, Malene Vahl Rasmussen oqarpoq.
- Sakkutuut mittarfimmik, atortunik, illunik nunamillu teknikkikkut misissuillutik maaniikkaangasa aamma ikiorluarsimavaat piviusorlu takutillugu.
Narsarsuup Amerikamiulli sakkutooqarfigiunnaarmassuk nunaqarfinngornissaa ukiorpassuarni anguniarneqarsimasoq taassuma oqaluttuaraa:
- Nunaqarfiujunnaassagaluarpat aliasuutigissaqaarput. Taamaammat sakkutooqarfiliortoqassappat Kangerlussuartuulli iliorusuppugut, arlaannaataluunniit mattutinngimmagu.
Danmarkimi naalakkersuisut aningaasaqarnermut inatsimmik siorna atsiorput. Tassa nunatsinnut 1,6 milliardit koruunit aningaasaliissutigineqarput. Aningaasallu ilaat Qaqortumi umiarsuarnut talittarfiliornissamut atorneqarnissaat pilersaarutigineqarpoq.
Malene Vahl Rasmussenip talittarfik nutaaq marloqiusamik atorneqarsinnaasutut taavaa, tassa taanna innuttaasunit sakkutuunillu atorneqarsinnaammat.
- Taamaalilluni kujataani siunissami sakkutooqarnerulernissaanut atorneqarsinnaammat, talittarfilli aamma inuussutissarsiornikkut pitsaasumik ineriartortitsisoqarsinnaalissaaq, taanna oqarpoq.
