Tassaarsuaqarsinnaaneranut aarlerisaarut pillugu: Saqqummiunneqartut imaannaanngillat
Inuit 176-it illuisa tassaarsuqarneranit eqqugaasinnaanerat pissutigalugu nuunnissamut ikiorneqarsinnaapput.
Karrat Kangerluannimi qaqqami aalaqqajuttoq annertooq ataatsikkut sisuussagaluaruni tamanna tassaarsuarmik pilersitseratarsinnaavoq. Tassaarnissaa siusinnerusukkut ilisimagisamit annertunerungaatsiarsinnaavoq.
Malissuit Qaarsut, Niaqornat, Saattut, Ukkusissat Ikerasaallu taavalu Uummannap ilarujussuinut tassaarsuaqartitsisinnaapput.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Aamma najugaqarfigineqanngitsut Nuugaatsiaq Illorsuillu eqqugaassapput. Nunaqarfiit taakku marluk 2017-imi inuit sisamat ajunaarnerannik kinguneqartumik tassaarsuaqarneraniilli inuerutitinneqarput.
Niaqornani Qaarsunilu najugaqartut eqqugaanerpaassapput. Niaqornani innuttaasut 35-t Qaarsunnilu innuttaasut 113-it takorloorneqarsinnaasuni ajornerpaamik pisoqaraluarpat tassaarsuarmik eqqugaaratarsinnaapput.
Innuttaasut ima amerlatigipajaartut nuunnissaminnik periarfissinneqarput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Paasissutissiinermik ataatsimiititsinerit ingerlanneqartut
Piffinni aarlerinartuniittuni inuit katillugit 176-it nuunnissamut ikiorneqarnissamik maanna neqeroorfigineqarput. Avannaata Kommunianilu borgmesterinngortussap, Sakio Fleischerip tamanna kommunimut suliassarujussuussanera nasserutigaa.
Taanna Uummannamut nunaqarfinnullu inunnut nuunnissamut pilersaarutit pillugu paasissutissiiarorluni maannakkut angalavoq.
- Saqqummiunneqartut imaannaanngillat aammalu nutaarsiassaq siuliatigut saqqummiunneqartartuni annertunertut oqariartuutigineqarpoq. Tassa sisooratarsinnaasup annertuup massakkut pilersimasup ataatsimut oqariartuutigineqarnera soorunami innuttaasunit assigiinngitsumik qisuariarfigineqartutut isikkoqarpoq, borgmesterinngortussaq oqarpoq.
Niaqornani, Qaarsunni, Ikerasammi, Saattunilu paasissutissiinermik ataatsimiititsisoqarpoq.
Ataatsimiititsinerit aqagu Uummannami ingerlanneqaqqissapput tallimanngorpallu Ukkusissani ataatsimiititsisoqassalluni.
AAMMA ATUARUK Mikkel 2017-imi tassaarsuaqarnerata kingorna nuutsinneqarpoq: Tassuma nuukkusuttoqarnissaa qularutigaa
- Niaqornat aamma Qaarsut soorlu nilliasaatinik pisariaqartitsisoqalissappata nilliasaatinik pilersuineq ingerlanneqarnikuuvoq, kisianni ippassaq paasisarput naapertorlugu pitsaanernik pisariaqartitsineq oqariartuutigineqarpoq, taamaattumillu aamma taakku misissorlugit ingerlaannartumik aallartinnissaat oqariartuutigineqarpoq. Taamaalilluta aamma innuttaasut toqqissisimanarnerusumik najugaqarnissartik piniassammassuk, Sakio Fleischer oqarpoq.
Uummannami:
Innuttaasunut Illorsuarmiunut sisamanngorneq 13 maj nalunaaqutaq ataatsimut. 13:00
Innuttaasunut Nuugaatsiarmiunut 13 maj nalunaaqutaq sisamanut, 16:00
Innuttaasunut Uummannarmiunut sisamanngorneq 13 maj unnukkut arfineq pingasut qeqqanut 19:30
Ukkusissat: Tallimanngorneq 14 maj ullaakkut qulingiluanut 09:00
Inuilli nuukkusunnerlutik namminneq aalajangissavaat – nuutsitsinissamullu pinngitsaaliissuteqartoqarnavianngilaq.
Nuunnissamut neqeroorummut akuersisut Avannaata Kommunianit ikiorneqassapput.
Innuttaasut aallaqqaammut pinasuartumik inissinneqarnissamut neqeroorfigineqassapput kingornatigullu sapinngisamik sukkanerpaamik inissiamik attartugassinneqassallutik.
Inissianik nutaanik sanaartortoqassanngilaq.
Nuuttoqarnissaanut ulluliisoqanngitsoq
Innuttaasut sumut nuukkusunnerlutik kissaateqarsinnaapput, tamatumanili inissiamik attartugassaqarnersoq apeqqutaassaaq.
Innuttaasut nammineq piumassutsiminnik nuussinnaanerminnik nalunaarfigineqarnertik qanoq tiguaat?
- Tassa uani oqariartuutigineqartut, kiffaanngissuseqarneq, sumiluunniit najugaqarsinnaaneq nammineq inuup toqqagassarigaa aamma ippassaq erseqqissaatigineqartoq isumaqarpunga nammineq aalajangissuaat qanoq pissanerlutik qanorlu ingerlariaqqissanerlutik.
Inuit nuukkusukkunik qaqugu nuussanersut ullulerneqanngilaq.
