Tasiilami sapaatit akunnerata naanerani illut, pequtit assigisaallu aseruatitingaatsiarput.Assi: Thomas Ørum Kristensen

Borgmesteri: Naalakkersuisut Tasiilamut ikiorsiisariaqarput

Tasiilami sapaatiti akunnerata naanerani piteqqap piliaani pequtit aseruatitersimasorpassuupput. Borgmesteri eqqugaasunut ikiorsiisoqarnissaanik noqqaassuteqarpoq.

Tasiilami sapaatip akunnerata naanerani piterarujussuarmat innuttaasunik qujanartumik ajuqusertoqanngilaq piterarli pigisapassuarnik ajoqusiivoq, tassa ilaatigut illut, angallatit biilerpaalussuillu ajoqusermata.

Danmarkimi silarsiortut nalunaarput Tasiilami piteqqap anoraasuasarneri sekundimut 53 meterinik sakkortussuseqartarsimasut.

Tasiilami piterarmat illut, igalaarpassuit, biilit, snescooterit umiatsiallu arlalissuit ajoquserneqarput.

Piteqqap kingunerisaanik innuttaasut 47 -it angerlarsimaffimminnit allanut nuunneqartariaqarsimapput.

Kommuneqarfik Sermersuup borgmesteria Avaaraq Olsen nalunaarpoq Tasiilami ajuqusikkanik iluarsartuussinermi aningaasartuutaasussanut nunatta karsia matussuseeqataaqqullugu qinnuigineqassamaartoq.

Kommuneqarfik Sermersuumi Tasiilami ajunaarnersuaq ima annertutigisoq nalilerpara allaat naalakkersuisut ajunaarneqartillugu aningaasanut inatsimmit ikiunermut atugassiissutinik aallartittariaqassallutik, inuit eqqugaasut ikiorserneqarniassammata

Kommuneqarfik Sermersuumi borgmesteri allappoq Tasiilami piteqqap eqquinera ajunaarnersuartut nalilertariaqarmat aningaasanut inatsimmit ajunaarnersuaqartitsillugu ikiorsiissutaasartut atorlugit Tasiilamiut ikiorneqartariaqartut.

AAMMA ATUARUK Mikkel Bianco: Piterarmat sarfaarukkatta annilaangaleraluarpugut

Aningaasanut inatsimmi ajunaarnersuaqartillugu ikiorsiigasuarnissamut 10 miliuunit koruuninik illuartitsisoqarsimavoq, taakkua innuttaasunut sillimmateqanngitsunut pigisaminnik annaasaqartunut ikiorsiissutaasarput.

Kalaallit Rødekorsiat Tasiilarmiunut 100.000 koruuninik ikiorsiissuteqarniarluni nalunaarpoq.

Tasiilami ajornartoornermi ataatsimiittoqassaaq

Tasiilami arfininngormat unnuakkut piteqqap qanoq annertutigisumik aseruisimanera suli ilisimaneqanngilaq.

Tasiilarmiulli piterarnissaanut piareersarsimalluarsimasut kommunip immikkoortortaani pisortaq Hjørdis Viberg oqarpoq.

- Pilersaarutit innuttaasunit tmanit malinneqarput. Tasiilap nunaqarfittai qujanartumik annertunerusumik aseruasoqarsimanngillat, Hjørdis Viberg oqaluttuarpoq.

Tasiilami aqqusernit tarmarmik maanna aqqutigineqarsinnaasut, kommunillu sulisui aserusimasunik aaqqissuillutik aallartereersut, ullunili arlalinni tulliuttuni silarlukkallarnissaa ilimasaarutaasoq Hjørdis Viberg oqarpoq-

Tasiilami piterarnerata nalaanni 70-seriarluni ikioqqusunit saaffiginnittoqarsimavoq innuttaasullu 47-t allamut nuunneqartariaqarsimapput, taakkunannga 30-t katersortarfimmi unnuisinneqarsimallutik.

AAMMA ATUARUK Tasiilami arfinngorpat piterarnissaa DMI-mit ilimasaarutigineqarpoq

Allamut nuunneqartut ilaat 13-t illoqarfimmi ilaqutaannukaanneqarsimapput, ilaqutariillu ataatsit napparsimasuutillit napparsimavimmut nuunneqarallarsimallutik.

Tasiilami sakkortuumik piterarnera innuttaasut ilaannut annilaarutaammat innuttaasunut katersortarfimmi unnugu nal. arfineq marluniit ataatsimiitsitsisoqassaaq.

Tassani ilaatigut piteqqap aserusaanik iluarsartuussinissami kommunip qanoq ikiuussinnaanera eqqartorneqassapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl