Borgmesteri: Kujataamiut kujataani angerlarsimaannarusupput

- Soorunami ajuusaarnarpoq taama isikkoqaruni, kisianni nuannaarutigeqaara inuit sulerusussusillit pigigatsigit suliffissaqarfiusunullu aamma nuukkusussinnaasut, Simon Simonsen oqarpoq.

Innuttaasut ikiliartornerat kujataani maluginiarneqarnerussaaq, amerlanerillu nunaqarfinniit illoqarfinnut nuussapput.

Inuit 500-t sinnilaarlugit nunaqarfinni 2030-mi najugaqassasut misissuinermi eqqoriarneqarpoq. Kujataani nunaqarfiit 1500-nik maanna innuttaqarput.

Naak Maniitsoq Kujataaniit ungasikkaluartoq, kujataani innuttaasut Maniitsumi alumiiniuliorfittaartoqassappat sulerusupput.

Ilisimatooq Rasmus Ole Rasmussen nuttartarneq pillugu misissuisuuvoq, Kujataanilu innuttaasut nuukkusussinnaasut taassuma oqaatigaa:

- Illoqarfinni nunaqarfinnilu innuttaasut Maniitsumut nuukkusussinnaapput. Kujataanimi innuttaasut 2030-mi ikilisimanissaat eqqoriaanerit takutippaat, Rasmus Ole Rasmussen oqarpoq.

Aatsitassarsiorneq tunisassiorfiillu ammaqqinneqartut. Tassa suliffissaqartitsiniarnermi iliuusissatut pilersaarutigineqartut ilaat. Simon Simonsen ima oqarpoq:

- Kujataani inuussutissarsiornikkut suliffissaqartitsiniarnikkullu periarfissanik nutaanik periarfissiisinnaasunik pilersitsinissamut Kommune Kujallermi kommunalbestyrelsimi ilungersuutigaarput. Naalakkersuisut peqatigalugit Kujataani aatsitassarsiornikkut periarfissanik ungasissorujussuanngitsukkut ammaasinnaassasugut neriuutigaara. Suliffiit nutaat taamaaliornikkut pilersinneqarsinnaapput, Simon Simonsen oqarpoq.

Kujataani najugaqaatigaluni Maniitsumi suliartorusuttoqartoq ilisimatuut inunnik isumasiuineranni saqqummerpoq:

- Assersuutigalugu alumiiniuliorfimmi aatsitassarsiorfimmiluunniit ulluni 14-ini suleriarluni Kujataanukaqqisuttoqarpoq, Rasmus Ole Rasmussen oqarpoq.

Innuttaasut ikilippata akileraarutitigut isertitat aamma ikilissapput, innuttaasunullu sullissinissamut aningaasat ikinnerulissallutik, taamaammat Simon Simonsenip iluaraa kujataani najugaqaatigalutik illoqarfinni allani suliartorusuttoqarmat:

- Taamatut piumassuseqartoqarsimappat nuannaarutigaara. Taamaasilluni takuneqarsinnaammat kujataamiut kujataani angerlarsimaannarusuttut. Inuussutissarsiornikkullu suliffissaqarnikkullu periarfissinneqarunik maani nunaqaannarnissaminnik soqutiginnissapput. Sumiluunniit tamanna takussutissaasarpoq suliffissat periarfissallu pitsaanerusut malersorneqartartut, Kommune Kujallermi borgmesteri Simon Simonsen naggasiilluni oqarpoq.

Nuttartarneq pillugu nalunaarusiap eqikkarneqarnera nittartakkami nanoq.gl-imi atuarneqarsinnaavoq.