Borgmesteri: Aningaasaannarnik nassitsigitsi
Sapaatit akunnerata naanerani Iqalunni ilinniartut ineqarfiat ikuallallariillarmat tupinnaannartumik ikiuiumasoqarsimaqaaq, ilami nerisassat, atisassat aningaasallu Canadamit tamaniit nassiussuunneqartut imaaginnavissimapput.
Naak ikuallattoorneq inuit marluk inuunerannik akeqarsimanera pisortatigoortumik uppernarsarneqanngikkaluartoq ikuallagussaasut ilinniartup meerai inersimasuussasut naatsorsuutigineqarpoq. Toqusimasulli timaat ikuallaffikorsuarmi suli nassaarineqanngillat.
Ikuallanneq qanoq aallartissimanersoq suli paasineqanngilaq. Tassami ikuallaffiusoq qamisarneqarmat imeq atorneqartoq issersuup ingerlaannaq qerrutsereersimammagu misissuinerit pisarioqaat.
Ineqarfik ikuallammat inuit 100-t angerlarsimaffeerupput, tassalu affaat 18-nit inorlugit ukioqartuullutik. Tamarmilli maanna inissikkallarneqareerput, ilaat akunnittarfinnut, allallu ikinngutiminnut inissikkallarsimallutik.
Ilinniartut sinngusaannatik atorlugit ikuallattumit unnuaannarsuarmi qimarratillarmata ilaat kingunerlutsitsisimaqaat, ajunaarnersuaqartilluguli ikiorsiigasuartussat ulapputilereersimapput.
Iqalummiulli Canadamiullu sinneri ikiuulluangaarmata borgmesteriusoq eqqumiiginarsinnaasumik ima nalunaaruteqartariaqalerpoq: Aningaasaannarnik nassitsigitsi, allanik atorfissaqartitsinngilagut, qujanaq.