Borgmesteri: Akisussaaffiit kommuninut tunniussuunneqarlit
Issittumi sakkutooqarfissap illoqarfimmi sorlermi inissinnissaa ukiaru inatsisartut ataatsimiinneranni aatsaat aalajangiiffigineqassaaq. Pisortat ingerlataat kommuneqarfinnut agguataarneqarnissaat Naalakkersuisut anguniagaraat. Taamaattumik Nuuk kisimi sanaartorfigineqannginnissaanik anguniagaqarneq Issittumi sakkutooqarfissap Nuummut inissinneqarneratigut oqaluttuaannanngussasoq, Kommune Kujallermi borgmesteri isumaqarpoq.
- Akisussaaffeqarfiit kommuninut tunniussuunneqarnissaat kissaatigaarput, Kommune Kujallermi borgmesteri Simon Simonsen oqarpoq.
Issittumi sakkutooqarfissaq Nuummi inissinneqassagaluarpat, aningaasat 50 millionit koruunit missaaniittut sipaarneqarsinnaasut, nalunaarusiami allaqqavoq. Narsarsuarmullu inissinneqassagaluarpat, aningaasat 43. millionit koruunit sipaarneqarsinnaassallutik.
Aningaasat sipaarutaasussat 7 millionit koruuninik nikingassuteqarput, taamaammat Kommune Kujallermi borgmesteri Simon Simonsen suli isumalluarpoq, naak nalunaarusiami innersuussutit naapertorlugit Nuummut inissiineq aningaasanik sipaaruteqarfiunerussagaluartoq.
- Narsarsuaq sakkutooqarfiunikuuvoq, taamaammat piukkunnaateqarluarpoq. Aamma mittarfeqareerpoq umiarsualiveqarlunilu, taamaammat narsarsuarmiippat inuiaqatigiinnut akikinnerusinnaassalluni, Simon Simonsen oqarpoq.
Issittumi Sakkutooqarfik Nuummut Narsarsuarmulluunniit nuunneqassappat illunut assigisaanullu sanaartornermut aningaasat 122 millionit koruunit atorneqarnissaat naatsorsuutigineqarpoq.
Sakkutooqarfik Nuummut inissinneqassappat tamanna inissaaleqinermut ajoqutaaginnassasoq Simon Simonsen isumaqarpoq.
- Illuliassarpassuit Nuummi sananeqassapput, maannalu aamma inissaaleqisoqaqaaq. Inuinnaat initaarnissaminnut kingullinngortinneqassappata, tamanna inunnut nuannernavianngilaq, Simon Simonsen oqarpoq.
Tamanna pillugu Kommuneqarfik Sermersuummi borgmesteri Asii Chemnitz Narup ima akissuteqarpoq.
- Issittumi sakkutooqarfik Nuummiissappat, inuinnarnut attuinavianngilaq.