Akunnittarfiliornissap iluatsinnginnera borgmesterip uitsatiginngilaa
Malaysiamiup akunniuttarfiutillip, Berjaya Corporationip sanaartornissamut pilersaarutini maanna utertippaa. Suliniut innuttaasunit, politikkerinit akerliuffigingaatsiarneqarpoq.
AAMMA ATUARUK Nuummi Nuutoqqami akimarpaluttumik akunnittarfiliortoqasaanngitsoq
Naak borgmesterip Charlotte Ludvigsenip akunnittarfiliornissaq piumasarigaluaraa, taamaatitsineq tigulluarpaa:
- Siullermik oqarusuppunga, taamatut aalajangernerat ataqqivara. Nuannaarutigaaralu innuttaasuninngaaniit oqariartuutigineqartut taakku tusaammassuk. Taassuma takutikkamiuk uagut kulturitsinnik ataqqinnittuusut. Taamaattumik taamatut aalajangernerat ataqqivakka, borgmesteri oqarpoq.
Akunnittarfimmik isumassarsineq 2011-mi isumassarsiaavoq
Taamaattorli Berjayap Nuummi sinniisuata Alex Tanip KNR-imut oqarnera naapertorlugu kommuniminngaaniit inissisimaffissaatut innersuussutigineqartup tapersersortukinnera tupaallaatigaa, naak kommunip nammineerluni siunnersuutigigaluaraa.
Charlotte Ludvisenilli nassuaatigaa nuutoqqami ineriartortitsinissamut tunngatillugu ingerlatsivimminngaaneersut 2011-mili akunnittarfiliortoqarnissaa siunnersuutigineqarpoq.
- Kisianni ullumikkut tusaasinnaasavut malillugit inuttaasut kissaatiginngilaat takanani akunnittarfeqarnissaa. Taamaammat allami inissisimavissaanik nutaamik ujartuineq maanna tulluartuusoraara., taanna oqarpoq.
AAMMA ATUARUK Borgmesterip tullersortaa akunnittarfiliornissamut akerliusoq
Nunarput kangianiit takornariarneqarluassasoq
Alex Tanip akunnittarfissap sumi inissisimanissaa maannangaaq ilisimanngilaa, naalli Nuummi pilersaarusiorneq aallaqqaataaniit aallarteqqittussanngoraluarlugu, nunatsinni akunnittarfiliornissaq soqutigineqigitsik taassuma naqissuserusuppaa. Berjayammi oqarnera naapertorlugu kangianeersut nunatsinnut takornariartut siunissami amerlingaatsiarumaarput.
- Maanna akunnittarfiup inissisimaffissaata sumiissinnaanissaa kommunep misissuleruttorpaa. Kisianni isumaga malillugu akunnittarfiit allat peqatigalugit illoqarfiup qeqqani inissisimanissaa torraasinnaasoq isumaqarpunga.
