Nuutoqqami akunnittarfiliortoqaraluaruni ima isikkoqassagaluarpoq, pilersaarummulli aningaasaliiniartut qinnuteqaatertik tunuartippaat.Assi: Berjaya Corporation Group of Companies

Nuummi Nuutoqqami akimarpaluttumik akunnittarfiliortoqasaanngitsoq

Nuummi Nuutoqqami akimarpaluttumik akunnittarfiliortoqarnissaanut pilersaarutit isummanik akerleriiffiusut piviusunngunngikkallassapput. Akunnittarfiutillimmi pilersaarummi tunuliaqutaasup sanaartorniarnini utertippaa illoqarfimmilu sumiiffimmi allami akunnittarfiup inissisimaffissaanik nutaamik ujartuinialerluni.

Kommuneqarfik Sermersuumi kommunalbestyrelsip akunnittarfimmut akimarpaluttumut pilersaarutip inissisimaffissaanut qinnuteqaat tusarniaassutiginiarlugu novembarip ulluisa 26-anni aalajangerpaa.

Pilersaarut naapertorlugu akunnittarfik akimarpaluttumik 95-inik ineerartaqassaaq, imerniartarfeqassaaq, neriniartarfeqassaaq kiisalu ataatsimiittarfeqarlunilu timigissartarfeqassaaq – taannalu Nuummi Nuutoqqami sanaatorniarneqaraluarluni.

AAMMA ATUARUK Borgmesterip tullersortaa akunnittarfiliornissamut akerliusoq

Nuutoqqamili sanaartornissamut pilersaarutit piviusunngussanngillat. Malaysiamiummi akunniuttarfiutillip, Berjaya Corporationip sanaartornissamut pilersaarutini utertippaa.

- Pilersaarummut qinnuteqaaterput sapaatip akunnerani matumani utertipparput, taarsiullugulu akunnittarfissatta inissisimaffissaanik nutaamik ujartuiniarluta, Berjayami pisortap allattaa, Alex Tan oqarpoq.

Inissisimaffissaa kommunimit siunnersuutaasoq

Taassuma pilersaarutip innuttaasunit politikeriniillu tigulluarneqannginnera tupaallaatigaa. Akunnittarfiummi inissisimaffissaa kommunimit innersuussutaavoq:

- Tikikkama inissisimaffissaa kommunimit innersuussutigineqarpoq. Taamani illoqarfiup ilaata oqaluttuassartaa ilisimasaqarfiginngilara. Maanna tamanut tusarniaassutigineqareersoq inuit sumiiffimmut qanoq misigisimanersut paasisinnaanerulerparput, Alex Tan oqarpoq.

Alex Tan qaammatit pingasut missaat Nuummiippoq, taassuma kommunalbestyrelsit suleqatigalugit inissisimaffiusinnaasut misissorpai akunnittarfimmullu pilersaaruteqarnissamik suliaqarluni.

Akunnittarfissap inissisimaffissaanik allamik Nuummi ujaasisoq

Akunnittarfiup Nuutoqqami inissisimaffissaanik qinnuteqaatip utertinneqarnera pakatsinanngitsuunngilaq, tassungami piffissamik aningaasanillu atuisoqarpoq:

- Suliffeqarfitsinnut soorunami pakatsinarpoq, sumiiffimmi taanna aamma kusanarluinnarpoq. Inuilli avatangiisillu ataqqisariaqarpavut. Allatut ajornartormi sumiiffissaanik allamik misissuisariaqarpugut, Alex Tan oqarpoq.

AAMMA ATUARUK Nuummi Nuutoqqami akunnittarfiliortoqarnissaanut akerliusut

Illoqarfiup pingaarnersaata pisoqartaani, Nuutoqqami akunnittarfiliornissamut pilersaarutit innuttaasunit akerlerineqangaatsiarpoq.

Nuummi politikerit suliamut atatillugu aamma isumaqataanngillat, pilersaarummullu akerliusoqangaatsiarluni.

Akunnittarfiliorniartullu tamanna pillugu sumiiffimmi tassani sanaartorniarunnaarput.

Akunnittarfiutilik Islandimi akunnittarfimmut aningaasartuuteqarnikuuvoq tamannalu Issittumut aamma siammarterusuppaat, tamannami asiamiut takornariaqarneranut ilippanartoqarluarsoraat. Berjaya Ilulissani akunnittarfiliornissamik aamma pilersaaruteqarpoq.

Akunnittarfiutillip akunnittarfiit Japanimi Kyotomi Four Seasons Hotel & Residences, Vietnamimi Hanoi-imi Sheraton Hotel aamma Malaysiami Kuala Lumpurimi Ritz Carlton Residences kiisalu akunnittarfiit 17-it Asiami Tuluit Nunaannilu maannamut pigereerpai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat