Borgmesteri naalakkersuisorluunniit? - Peter Olsen nalornisoq

Inuit Ataqatigiit Kommune Qeqertalimmi ajugaalluavissorput. Partii qinersisartut 53,2 procentiinit qinerneqarpoq, borgmesteriutitaqaannarsinnaallunilu.

Taaguunneqarnerpaarli nalornisoorfimmiippoq. Peter Olsen 442-nit taaguunneqarluni maannamut borgmesteriusoq, Ane Hansen, 387-nit taaguunneqartoq qaangerpaa.

Taamaammat Peter Olsen borgmesterinngorsinnaavoq.

AAMMA ATUARUK Inuit Ataqatigiit Inatsisartunut qinersinermi ajugaasut

Peter Olsenili aamma Inatsisartunut qinigaavoq, partiialu tassani annertaalerpoq. Siulittaasuatalu Peter Olsen naalakkersuisunngoqqunissaanut periarfissaqarpoq.

Nalornisoornerujussuaq

- Tassa soorunami nassuerutigissavara, assorujussaq nalornisoorfimmiikkama. Uanga inissiffiga taamaattoq politikerip kialuunniit takorloorsinnaasimagunanngikkaluarpaa. Soorunami politikeritut tamatta aamma borgmesterinngorusussinnaasarpugut. Aamma taassuma saniatigut periarfissaappat aamma naalakkersuisunngorsinnaaneq tamatta aamma takorluugaralugulu aamma nuannerunartittaripput, Peter Olsen, oqarpoq.

Taanna Inatsisartunut Kommune Qeqertaliullu kommunalbestyrelsianut qinersiviup siuliani aamma ilaasortaavoq. Inatsisartullu Aningaasaqarnermut Akileraartarnermullu Ataatsimiititaliaani pissaaneqarluartumi aamma ilaasortaavoq.

255-inillu taaguunneqarluni Inatsisartunut ilaasortanngoqqippoq. Partiia, IA, maanna annertaavoq, Naalakkersuisunngorumaartussanillu pilersitsiniarnermi aallarnisaataasumik oqaloqatigiinnissanut siuttuusinnaatitaalluni.

- Siulittaasutta qanorpiaq oqarfigissaneraanga tusassallugu soorunami aamma pingaartippara. Taavalu taama toqqagassinneqassagaluaruma (bormesteriunissaq Naalakkersuisunulluunniit ilaasortaanissaq, aaqq.) aamma ilaquttakka oqaloqatigilluaqqaartariaqarpakka. Kisianni massakkut soorunami Qeqertalimmiippunga. Qeqertalillu pingaartillugu sulinissara naatsorsuutigaara, Peter Olsen, oqarpoq.

Tassalu, Peter Olsen, nalornisoorfimmiippoq. Borgmesteritut atuuffik toqqassavaa, imaluunniit Naalakkersuisunut ilaasortanngorsinnaassava?

- Aap, akiuminaatsupilussuuvoq. Taamaappoq. Kina isumaliorpa taama inississalluni, Peter Olsen, oqarpoq.