Boko Haramikkut Nigeriami atuartunik qimarngussisuunerartut
Nigeriami atuartut 400-t 600-llu missaanniittut qimarngunneqarnerannut islamisiortut peqqarniisarniat Boko Haram qimarngussisuullutik nalunaarput.
Taama nalunaaruteqartoq tassaavoq islamisiortut ingasattajaarniat siuttuat Abukabar Shekau.
- Uanga tassaavunga Abukabar Shekau sorsuttartoqativut Nigeriami Katsinami atuartut qimarnguppaat, taanna nutaarsiassaqartitsivik AFP naapertorlugu taama oqarpoq.
Atuartut 400-t 600-llu akornanni amerlatigisut tallimanngornermi tammarput, angutit sakkulisaartut illoqarfimmi Kankarami atuarfimmik saassussinerisa kingorna.
AAMMA ATUARUK Nigeriap præsidentia: Sakkutuujunngitsut 51-it akerliussutsimik takutitsinerni toqutaasimapput
Nukappiaqqat hunnorujulikkaat tammarnerat Nigeriamiorpassuarnit uippallissutigineqarpoq, naalakkersuisunullu kamannertik ersersillugu.
Nigeriami naalakkersuisut isornartorsiorneqareeqaat, innuttaasut ingammillu meeqqat islamisiortunut ingasattajaarnianut Boko Haramikkunnut illersorneqanngimmata.
Nukappiaqqat tammaaneqartut nukiit tamaasa atorlugit nassaarineqarnissaannut Nigeriami illuatunguliutttut naalakkersuisunut kimigiiserput, nukappiaqqat naapertuilluanngitsuliorfigineqartinnagit pinngitsaalillugilluunniit sakkuttuunngortinneqartinnagit.
Boko Haramikkut assingusumik 2014-imi saassussipput, illoqarfimmi Chiboimi atuarfimmut angerlarsimaffiutigisumut saassussimmata taamani niviarsiaqqat 276-it qimarngunneqarput. Taakkunannga 100-t missaannik amerlatigisut suli nassaarineqanngillat.
