Boassenip EU-mi politikerip kalaallit pillugit sulianut tunngatillugu attaveqarnissaanik ikiorpaa

Trumpimik tapersersuisup Jørgen Boassenip kalaallit Danmarkimit qanoq pineqartarnerat nunani tamalaani maluginiarneqarnissaa kissaatigigaa, Naja Lyberthip spiralilersuisimanerup politikkikkut sakkugineqarnissaa mianersoqqussutigaa.
Jørgen Boassenip suliat mianernartut nunanut allanut politikkimut tunngasut ajornartorsiorneranni sakkugineqarsinnaanerisa ernumassutigineqarnerat paasigaluarlugu, kalaallit eqqugaasimasut EU-milu ilaasortat attaveqatigiinnissaannut taamaallaat ikiuiniarnini aalajangiusimavaa. Assi © : KNR
juunip 22-at 2026 07:57
Nutserisoq Ivalu Thorleifsen

EU-mi inatsisartunut ilaasortat aallartitaasa septemberip naanerani Nuummut tikeraarnissartik pilersaarutigaat, tamanna EU-p tusagassiuutinut allattoqarfiata paasissutissiissutigaa.

Aallartitaasut ilagaat inatsisartuni ilaasortaq Margarita de la Pisa Carrión, spaniamiut talerperliuniani partii Voximeersoq. Taassuma Trumpimut tapersersuisoq Jørgen Boassen una qaammat aallartilaartoq attaveqarfigisimavaa.

Boassen naapertorlugu Spaniamiit inatsisartup ’Danmarkip kalaallinut pinerluuteqarsimaneri misissorniarlugit’ ikiortiserisimavaa.

Taamaattumik Boassenip spiralilersuisimanermi attuumassuteqartunut inatsisitigullu ataataqanngitsunut kiisalu Danmarkimi angajoqqaat qitornaminnik arsaagaasimasunut attaveqartinniarsarisimavaa.

- Danmarkip qanoq iliorsimanera paaserusuppaat uangalu nammineq isiginnittaasera naapertorlugu Danmarki inatsisit tunngavigalugit pineqaatissiiniarnissamut pisinnaatitaaffeqanngilaq, Jørgen Boassen oqarpoq.  

- EU-mi eqqartuussivikkoortariaqarpoq, EU-mut isornartorsiuisoq taama oqarpoq.

Kalaallit Nunaata pilerngunneqarneranut atorneqarusunngilaq

KNR-ip Margarita de la Pisa Carrión angalanissaanut suna siunertarineqarnersoq paasiniarlugu piffissarititaq sioqqullugu apersorniarsimagaluarpaa iluatsinngitsumilli.

EU-mili inatsisartuni ilaasortap ikiortaata politikerit angalaqataasut pisortatigoortumik pilersaarummut ilanngunneqarsinnaasunik ’soqutigisaqaqatigiinnik naleqquttunik siunnersuuteqarsinnaanerinut’ kajumissaarneqarnerat paasissutissiissutigaa.

Jørgen Boassenip spiralilersinneqarsimasut pillugit oqaaseqartartoq Naja Lyberth aamma Klaus Frederiksen inatsisitigut ataataqanngitsunut ilaasoq, qaammat aallartilaartoq attavigai. 

Danmarkimilu kalaallit angajoqqaat qitornaminnik arsaagaasimasut aamma attaveqarfigisimanerarpai.

Naja Lyberth naapertorlugu ‘tupannaqaaq’. Attaveqarnerup EU-mi pisortatigoortumik attaveqarfiit aqqutigalugit saqqummiunneqannginnera tupigusuutigaa.

- Spiralilersuisimanerup Nunatta politikkikkut pilerngunneqarneranut - Danmarkip, Kalaallit Nunaata USA-llu akornanni aaqqiagiinngittoqarnerani sakkugineqarnissaa kissaatiginngilluinnarparput, taanna oqarpoq.

Naja Lyberth piumasarinngisaminik spiralilerneqarsimanini pillugu siulliulluni oqaluttuartuuvoq. Assi © : James Brooks/AFP/Ritzau Scanpix

Jørgen Boassenip spiralilersuisimaneq nammineq iluaqutissarsiniarluni atornerlunneratut Naja Lyberthip isigaa.

Klaus Frederiksenip aamma inatsisitigut ataataqanngitsut pillugit suliat nunanut allanut politikkimut tunngasut ajornartorsiornerannut sakkugineqarnissaat ernumassutigaa.

Jørgen Boassen USA-mi Europamilu politikkikkut talerperliuniat peqatigalugit aaqqissuussinerni arlalinni ukiuni kingullerni peqataasarpoq.

Politikkikkut oqalliffinni ilaatigut saqqummiussinermini spiralilersuisimaneq, inatsisitigut ataataqanngitsut Danmarkimilu meeqqat kalaallit arsaagaasarnerat pillugit siornatigut oqallisigisarpai.

Amerikamiut præsidentiata nunarput pillugu anguniagaanik siuarsaasutut, Donald Trumpip illersortaata tamanut oqaaseqaraagami spiralilersuisimaneq ilanngutikkajuppaa.    

Arnat spiralilersinneqarsimasut arlallit misigisimasatik pillugit nunani allani tusagassiuutinut apersorneqarumajunnaarsimapput, suliap Kalaallit Nunaat, Danmark USA-llu akornanni nunanut allanut politikkimut tunngasut ajornartorsiornerannut ilanngutinnginnissaa anguniarlugu.

- Boassenip eqqarsartaasaa naapertorlugu suliamut tunngatillugu oqaluttuarnini immaqa pitsaasutut isigaa, akuersitinneqaqqaanngilagulli. Attaveqarnissamut paasissutissat uannut tunngasut tunniussuunneqarnissaannut akuersinikuunngilanga, kisiannili taamaaliorpoq, Naja Lyberth oqarpoq, inuillu attaveqaqatigiittarfianni Jørgen Boassenip allagaa innersuussutigalugu.

- Suliaq uagut Danmarkimilu naalakkersuisuusimasut akornanniippoq, taanna maannakkut Danmarkip naalakkersuisuisa iliuuserinngisaat. Maannakkut naalakkersuisut spiralilersuisimaneq iliuuseqarfigileruttorpaat. Tamanna iluarisimaarparput.

- EU-p Jørgen Boassenillu suliamut tunngatillugu akulerunnissaat pisariaqartinngilarput. Spiralilersuisimanerullu nammineq politikkikkut iluaqutissarsiniarluni atornerlunniarneqarnera atorfissaqartinnagu, taanna ilaliivoq.

Jørgen Boassenip Naja Lyberthip Klaus Frederiksenillu attaveqaatitigut paasissutissaataannik ingerlatitseqqiinnginnermini akuersiteqqaarsimanerarpai.

Suliat pillugit allat misissuisariaqarput

EU-miit Jørgen Boassenip suleqatigineqarnera ilisimaneqanngilaq, EU-p tusagassiuutinut allattoqarfia paasissutissiivoq. 

Namminersuutitut aaqqissuunneqarsimasinnaasoq aallartitallu pisortatigoortumik pilersaarutaannut attuumassuteqanngitsoq tusagassiuutinut allattoqarfik allappoq.  'Kunngeqarfiup Danmarkip aamma Kalaallit Nunaata oqartussaassuseqarneranik nunallu killeqarfiisa innarligaassannginnerannik kiisalu kalaallit namminneq aalajangiisinnaatitaanerisa ataqqineqarnissaata pingaaruteqassusaa' EU-p erseqqissaatigaa.

Saniatigut EU-p 'Tamanna taassuma avataanit allanngortinniarneqarneranut tamanut Kalaallit Nunaanni innuttaasut akornanni, innuttaasut namminneq aalajangiisinnaassusaat akuersinissaallu eqqarsaatiginagit ingerlanneqartunut, sakkortuumik akerliuneq' maluginiarpaa. 

Jørgen Boassenip ikiuiniarnini USA-mut attuumassuteqannginnerarpaa, Danmarkilliuna kalaallinut qanoq pissusilersortarnera oqartussanit allanit misissorneqarnissaa kissaatigalugu oqarluni.

Boassenip suliat mianernartut nunanut allanut politikkimut tunngasut ajornartorsiornerannut sakkugineqarsinnaanerisa ernumassutigineqarnera paasigaluarlugu, kalaallit eqqugaasut EU-milu ilaasortat akornanni attaveqatigiittoqarnissaa kisiat anguniarlugu aalajangiusimavaa.

- Danmarkimmi pinerluutigisimasani nammineq ingerlassinnaanngilai. Namminerluunniit misissuisussaanngilaq taamaattumik EU-p USA-p allalluunniit Danmarkip iliuuserisimasaanik misissuisariaqarnerat eqqortuusoraara, taanna oqarpoq.

Spaniamiup EU-mi ilaasortap Margarita de la Pisa Carriónip siornatigut Spaniami inatsisartunut ilaasortaasimasoq Victor González uigivaa taannalu amerikami præsidentip Donald Trumpip attaveqarfigisaasa akornanniippoq.

Suliat ilaanni (spiralilersuisimaneq inatsisitigullu ataataqanngitsut) attuumassuteqartunit nunat akornanni politikkikkut pissutsinut suliat atoqquneqanngippata paasisinnaaviuk? KNR-ip Jørgen Boassen aperaa.

- Nunat akornanni politikkimut tunnganngilaq, USA akulerusimanngilaq. EU-juna aamma Danmarki EU-mut ilaasortaavoq. Suliaat tamarmik avataanit misissorneqassapput. Danskisut innuttaassuseqartitaavugut tusaaneqanngisaannarlutalu. Danmarkip uatsinnut qanoq pissuseqarnera nunarsuup sinneranit immaqa takuneqarsinnaalissaaq, taanna oqarpoq. 

Taanna naapertorlugu USA-p soqutiginninnera qujassutissaqarfissaannaavoq.

- Trumpi taamaaliorsimanngippat Danmarkip iliuuseqarfigisimajunnanngikkaa aamma nassuerutigisariaqarparput. Inunnit qitornaminnik annaasaqarsimasunit Donald Trump Jr-ip tikeraarnerata kingorna sianerfigineqarpunga oqarpullu 'Uuh maanna oqaloqatigerusuleriataarpaannga'. Siornatigut periarfissiisoqartarsimanngilaq eqqugaasimasullu iliuuseqarfigineqaqqissimanatik.