BMX-inik sikkilerluni unamminermi aatsaavissuaq nunatsinniit peqataasoqarpoq

Inuk Siegstad Gdanskimi Polenimiittumi aqagu aqaguagulu Baltic Gamesimi unammeqataassaaq, tassanilu unammereeruni Tallinimi Estlandimiittumi Simple Sessionimi februaarip ulluisa 22-anni 23-annilu unammeqataassaaq.
Allattoq Dorthea Johansen
februaarip 15-at 2014 12:34

- Polenimiittumi Gdanskimut massakkut unammiartorpunga, taava sapaatip akunnera tulliani Estlandimi Tallinimut unammiartussaanga.

Baltic Gamesimi unammeqataasussat 20-t missaanniipput, Simple Sessionimilu 100-ut sinnerlugit unammeqataasussaqarpoq. Inuk Siegstadip unamminermi angusarissaarnissani ilimagivallaanngilaa.

- Ilimagisinnaarpianngilara finalimi annguttussaassallunga, rampit uku sikkilerfigisussaasakka angisoorujussuugamik, uanga sikkilerfigisartakkannut naleqqiullugit. Ukulu unammisassamma sungiusimarpasittorujussuuaat taamatut unamminissartik, Inuk Siegstad oqarpoq.

Taamaakkaluartoq periarfissaqartilluni unammeqataasarniarpoq.

- Taamatut unammisaqattaariartunngikkuma ilikkariariartornaviannginnama periarfissat ammasut tigusarpakka, Inuk Siegstad oqarpoq, imatullu naggasiilluni:

- Qujaffissaqartorujussuuvunga soorunami, angajoqqaakka kammalaaterpassuakkalu Sisimiormiut. Taamatut angalaneq pissanganartorujussuuvoq nuannersorujussuullunilu.

Inuk Siegstadip BMX-inik sikkilerluni unammiartornera aningaasanik tapiiffigineqarnikkut piviusunngorpoq. Taamatut BMX-inik sikkilerluni qallunaanik kalaallinillu siornatigut peqataasoqarnikuunngilaq.

Inuk Siegstadip unammineri nittartakkani malinnaavigineqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq