Blok P-mi najugallit pinngitsaalineqassanngillat

Blok P-mi najugallit Nuup qinnguanut pinngitsaalissaassummik nuutsinneqarnavianngitsut, ineqarnermut naalakkersuisup Jens B. Frederiksenip erseqqissaatigaa.

- Kinaluunniit pinngitsaaliissummik nuutsinneqarnavianngilaq. Ineqartut ilaasa nuukkusunnginnerat paasereerparput, naak inaat peqqinnarpallaanngikkaluartut, oqummik ajornartorsiuteqarmata, jens B. Frederiksen oqarpoq.

Innuttaasut inissiani peqqinnanngitsuni najugaqarnissaat naalakkersuisunit kissaatigineqanngitsoq, Jens B. Frederiksenip oqaatigaa.

Taamaammat Blok P-mi najugallit, aamma utaqqiisaasumik allamut nuunnikuugaluartut, Nuup qinnguani najugaqalernissamut siulliusut, Jens B. Frederiksenip oqatigaa.

Blok P-mi najugallit ilaasa Nuup qinnguanut nuunnissaminnut atatillugu inimut akiliutigisartakkap qaffangaatsiarnissaa aarleqqutigaat.

Tamannalu ataatsimut isigalugu sipaariuteqarfiusinnaasoq Jens B. frederiksenip oqaatigaa.

- Inimut akiliutissat amerlanerulaassapput, tamanna anigorsinnaanngilarput. Kisianni kiassarnermut imermillu Blok P-mi atuineq Nuup qinnguani inissiassanut naleqqiullugu annertoorujussuuvoq, sisamariaammik ilaatigut annertussuseqarluni. Taamaammat tassuunatigut annertuumik sipaaruteqartussaapput. Aamma ineqarnermut tapisianik pisartagaqareeraanni inissiani nutaani soorunami aamma tapisiaqartoqarsinnaassaaq. Taamaammaat Nuup qinnguani najugallit ineqarnermut, kiassarnermut, imermullu akiliutigisartagaat ataatsimut isigissagaanni akikinnerusinnaassapput, Jens B. Frederiksen oqarpoq.