Blok 17-imi toqutsinermi pineqaatissiisoqarpoq
Unnerluunneqartut tassaapput nukappissaq pingasut 17-inik, 18-inik aamma 20-inik ukullit. 20-inik ukiulik toqutsisimasutut unnerluutigineqartoq ilaai marluk toqutsinnginnermi annersaasimasutut unnerluutigineqarlutik.
Toqutsisimasutut unnerluunneqartoq, 20-inik ukiulit, Sermersuup Eqqartuussiviata siulliullugu pineqaatissippaa.
Toqutsisimasutullu unnerluunneqartoq, killiligaanngitsumik Danmarkimi tarnimikkut innarluutillit paarnaarussivianniittussanngorlugu pineqaaatissinneqarpoq.
Pineqaatissiinerlu tamanna unnerluussisumit, Anders Knudsenimit iluarineqarpoq.
- Suliap uuma naggaserneqarnera nuannaarutigaarput. Nunatta Eqqartuussivianut ingerlatitseqqiinermi, unnerluussutini pisumi et-imi aamma 2-mi allassimasut tamatumunnga pissutaanerupput. Taakku pinerlunnernut annikinnerusnut tunngaasuupput. Toqutsinermulli unnerluussut tassa naammassivoq tamannalu nuannaarutigaarput.
Unnerluussisoq, Anders Knudsen taama oqarpoq.
Toqutsisimasutut pineqaatissinneqartoq, Danmarkimi tarnimikkut innarluutillit parnaarussivianniittussanngortitaanerata saniatigut, 20-inik ukiulik toqutaasup ilaqutaanut, katillugit 300.000 koruuninik taarsiisussanngorlugu aamma pineqaatissinneqarpoq, tassa toqutaasup anaanaa, ataataa qatanngutaalu tamarmik immikkut 100.000 koruuninik taarsiiffigitissallutik.
Toqutsisumut illersuisup, Sermersuup Eqqartuussiviata aalajangigaa, Nunatta Eqqartuussivianut ingerlateqqipaa. Toqutsinermut unnerluussissut pinnagu, taannami unnerluunneqartup illersuisuatalu akuerereerpaat, kisiannili toqutsinnginnermi annersaasimanermut tunngasut, Nunatta Eqqartuussivianut aalajangigassanngorlugit ingerlatitseqqiillutik.
Aamma unnerluunneqartup Danmarkimi killiligaanngitsumik parnaarussaanissaa, illersuisup Nunatta Eqqartuussianut aalajangigassanngorpaa, Nunatsinni pinerlussimasut inissiisarfianiitinneqarnissaa siunertaralugu.
- Nunatsinni pinerluuteqarsimasut inissiisarfianniisinneqaruni ikiorneqarnissaanut periarfissat amerlanerussapput. Danmarkimiisinneqarunimi ilaqquttani qimattariaqassavai.
Illersuisoq Helga Rosing oqarpoq.
Blok 17-imi toqutsinermi inuusuttut marluk allat sakkortuumik annersaasimasutut unnerluunneqartut, Nunatsinni pinerluuteqarsimasut inissiisarfianiittussanngorlugit pineqaatissinneqarput ukiuni marlunni inissiisarfimmiittussanngorlugit. Taakkua pineqaatissinneqarnertik akueraat.
Inuusuttut nukappissat eqqartuunneqarneranni pinerluutigineqarsimasut allat assigiinngitsut 28-it aamma saqqummiunneqarput, blok 17-imulli toqutsinermut attuumassuteqanngitsut.
