Blok 14-imi toqutsinermut atatillugu pineqaatissiisoqarpoq
(Nutartigaq nal. 14:01)
Angutit pineqartut marluk toqumik kingunilimmik nakuusersimasutut tassataavannguaq eqqartuunneqarput.
Unnerluussisut Nuup Eqqartuussiviani februaarip 18-iani eqqartuussisoqarmat piumasaqaatitik, tassa angutip 42-nik ukiullip ukiuni pingasuni 37-inillu ukiullip ukiup aappaata affaani pineqaatissinneqarsimasunut inissiisarfimmiittussanngortinneqarnissaannik aalajangiusimasaat ullumi Nunatta Eqqartuussiviani suliarineqarpoq.
Nuup Eqqartuussiviani februaarip 18-iani 42-nik ukiulik, ukiup aappaata affaani pineqaatissinneqarsimasunut inissiisarfimmiittussanngorlugu eqqaartuunneqarpoq, 37-nillu ukiulik pinngitsuutitaalluni.
Taamani 42-nik ukiullip pineqaatissinneqarnini Nunatta Eqqartuussivianut suliassanngorteqqippaa aamma 37-nik ukiullip pinngitsuutitaanera unnerluussisunit suliassanngorteqqinneqarluni.
Nunatta Eqqartuussiviata ullumi aalajangerpaa angut 42-nik ukiulik, peqqarniitsumik angutaasersutut toqumik kinguneqartumik pilerluuteqarsimasutut ukioq ataaseq qaammatillu qulit pinerluuteqarsimasunut inissiisarfimmiittussanngortitaassasoq. 37-inillu ukiulik pinerlunnermut peqataasimasutut qaammatini qulini pinerluuteqarsimasunut inissiisarfimmiittussanngortitaassavoq.
Eqqartuussivik ima nassuiaavoq:
"Taamanikkut Nuup Eqqartussiviani 37-nik ukiulik pinngitsuutinneqarsimangaluarpoq, eqqartuussivik isumaqarsimammat aallaasersorsimanermut peqataasimanngitsoq. Aallaasinik aalleqataasimanngilaq aammalu 42-nik ukiullip aallaat tunniummagu peqeriarlugu ilisimallugu.
Nunattali Eqqartuussisuuneqarfiata 37-nik ukiulik pisooqataasutut eqqaratuuppaa, 42-nik ukiulik timmiarsiummik pumpgun-imik toqutaasup tikiutinngitsaani ikkussuiniarneranik ikiorsimammagu, aammalu seqqorniarnerani unitsitsiniarsimanngimat
Nunatta Eqqartuussusuuneqarfia suliani allanik suleriaaseq naapertorlugu naliliisimavoq, toqumik kinguneqartumik angutaaserneq, pissutsit pisimasut naapertorlugit, ukiup aappaa qiteqqullugu Nuuk Eqqartuussivianit pineqaatissiisimanermik annerulaartumik pineqaatissiineqassasoq.
Eqqartuussisuunerulli pineqaatissiinermut annikilliliinerunissamut tunngavigisimallugit, inuit taakkua marluk aallaasersornerup nalaani annilaangasimanerat aammalu eqqarsartaatsimikkullu aallassatsimaarnerat. Tamannalu tunngaveqarpoq toqutaasimasut siusinnerusukkut unnukkut pineqaatissinneqarsimasut annersarlugit angutaaserfigisimammagit aammalu aallaasersornerup nalaani matu tukerlugu iserfingalugit toqunniarlugit sioorasaarsimallugit.
Pineqaatissinneqartut illersuisui piumasaqaateqarsimangaluarput taakkua iperarneqarnissaannik, isumaqaramik seqqorneq imminut illersorniarnermik tunngaveqartoq. Tamannali Nunatta Eqqartuussisuuneqarfiata itigartissimavaa, pineqaatissinneqartummi marluullutik aallaasit saqqummersimammatigit aammalu oqaloqatigiissutigisimallugu, toqunneqarsimasumut illersuutissatut saassunneqaraluarunik atussaneritik."
