Blinken Kangia Qiterlermut arfinilissaa angalasoq
USA-p nunanut allanut tunngasunut ministeria Antony Blinken Kangia Qiterlermut ullumi pingasunngornermi angalaqqissaaq.
Israel islamisiortunut Hamasimut siorna oktobarimi sorsulermalli Blinken Kangia Qiterlermut arfinilissaa angalavoq.
USA-p nunanut allanut tunngasunut ministereqarfiata oqaaseqartitaa Matthew Miller taama oqarpoq. Nutaarsiassaqartitsivik Reuters taama allappoq.
Blinken Saudi-Arabiami illoqarfissuarmut Jeddahmut angalassaaq, Saudi-Arabiami aqutsisut arlallit tassani ataatsimeeqatigissallugit. Egyptenimi illoqarfiit pingaarnersaannut Kairomut kingorna aamma angalassaaq.
Nunanut allanut tunngasunut ministerip Egyptenimi naalakkersuinikkut siuttut tassani ataatsimeeqatigissavai, Gazamut ikiorsiissutit annertusarneqarnissaasa sulissutigineqarnerat tassani eqqartorneqassallutik. Isumaqatigiinniarnerit Egyptenimit Qatarimiillu aqunneqarput.
Sakkuaakkunnaarallartoqarnissaa pillugu ataatsimiittoqartuarsinnarpoq, naallu sapaatit akunnerni kingullerni isumaqatigiinniartoqareeraluartoq, Israelip Hamasillu akornanni suli isumaqatigiissusiortoqarsinnaasimanngilaq.
Gazap sorsunnerup soraarnerani sanaqqinneqarnissaa isumannaatsumillu aqunneqarnissaa ataatsimiinnerni eqqartorsinnaassallugu Antony Blinkenip neriuutigaa.
Blinken pilersaarutit naapertorlugit maanna Israeliliassanngilaq. Blinken Kangia Qiterlermut piffissami kingullermi angalasarnermini Israelimut ilaatigut angalasarsimavoq.