Bjerringbromi toqutsineq: 23-nik ukiulik piffissamik killiligaanngitsumik pineqaatissinneqartoq
Tassunga atatillugu Viborgip eqqartuussiviani ippassaq pineqaatissiisoqarpoq.
23-nik ukiulik Hans Peter Bitsch Eskesen, toqutsisimasutut pasineqarluni eqqartuussaammat piffissamik killiligaanngitsumik pineqaatissinneqarpoq, sakkortuumillu arlaleriarluni persuttaasimasutut aamma pineqaatissinneqarluni.
Aviisi Viborg Amts Folkeblad taama allaaserisaqarpoq.
41-nik ukiulik Niels Ole Nuko, kalaallimik anaanalik, Bjerringbromi Bredgademi illumi toqutaavoq. Hans Peter Bitsch Eskesen, pisiniarfiup saavani akunnerup aappaata qeqqa qaangiummat tigusarineqarpoq. Eskesen tassani savilisarpoq.
Toqutaasoq imeqatigisarlugu, pineqaatissinneqartup 23-nik ukiullip eqqartuussinermi oqaluttarisimavaa, sunali pissutigalugu savilersorsimanini sukumiinerusumik nassuiaateqarfigisimanagu.
Angut eqqartuunneqartoq eqqartuussinerup ingerlanerani soqutigittaappasillunilu pimoorusserpasinngilaq, toqutsisimaninili eqqartuussinerup aallartinneranili nassuerutigalugu.
Toqutsisutut pasineqartoq silamigut inortuusoq eqqartuussinermi saqqummiunneqarpoq. Pineqaatissiineq ingerlaannartumik suliareqqitassanngortippaa, sakkukinnerusumik pineqaatissinneqarnissani pillugu suliareqqitassanngortitsilluni. Viborg Amts Folkeblad taama allaaserisaqarpoq.
