Biskoppissamik qinersineq ullumi aallartittoq

Kalaallit Nunaanni biskopimik ullumi qinersisoqassaaq.

Maannamut biskoppiusup, Sofie Petersenip soraarninngorniarluni juulimi nalunaarutigimmagu qinersinissaq aallartinneqarpoq. Sofie Petersen biskopitut 1995-imi maajip ulluisa 28-anni ivertinneqarpoq, ukiunilu 25-ni atuuffimminiilluni.

AAMMA ATUARUK Ukiut 25-t kingorna: Kina biskoppinngussava?

Kalaallit Nunaanni Ilagiit qullersaanni atuuffimmut inuit sisamat qinigassanngortittut tassaapput:

Kujataani provsti, Paneeraq Siegstad Munk.

Domprovst Johan Johansen Nuummi najugalik.

Upernavimmi palasi, Hans Jørgen Dinesen

Kiisalu Qasigiannguani palasi Henriette Have.

Biskoppitut suliassarpassuusut

Biskoppeqarfimmi allaffimmi pisortap, Mariane Hansen Heilmannip oqarnera naapertorlugu biskoppitut sulinermi suliassanik ulikkaarpoq.

- Biskopi ulluinnarni sulianik ulikkaarpoq, taannami ilageeqarnermut tunngassutilinni qullersaallunilu akisussaasuuvoq. Taassuma suliassaanut ilaasut tassaapput: Provstinut, palasiut ilagiillu sinniisaannut nakkutilliineq, Marianne Hansen Heilmann Qanoruumut oqarpoq.

AAMMA ATUARUK Sassartut sisamaasut: Biskoppissamik qinersineq aallartittoq

Tamatuma saniatigut palasinngortitsinerit oqaluffinnik atoqqaartitsinerit aamma suliassarisarai taassuma oqaatigaa.

Kalaallit Nunaanni iligiinni sulisut biskoppissamik qinersisinnaapput.

- Tassani ilagiit sinniisaat, palasit, ajoqit atuaasullu qaammammusiaqartuusut qinersisinnaapput, biskopeqarfimmi allaffimmi pisortaq, Mariane Hansen Heilmann oqarpoq.

Biskopinngortussaq Nuummi Hans Egedep oqaluffiani novemberip ulluisa 22-anni ivertinneqassaaq. Biskoppinngortitsinermi danskit biskoppii qulit najuuutissaapput, ataqqinartorsuaq Dronning Margrethe peqataanissaminut aamma qaaqqusaavoq.