Biskoppi palasinut piumasaqarpoq
Kalaallit namminneq pisuussutiginagu Danmarkimiittut qaammammut ataasiaannarlutik palasimit naalagiartinneqartarnerat allannguuteqassanngilaq. Taakkuupput napparsimaveqarfimmi uninngasut aamma Parnaarussivimmi matoqqasumi Herstedvesterimiittut tarnimikkullu napparsimasut.
Danmarkimi palaseqarneq decembarimi eqqissiviilliuutaalerpoq.
Aviisi Sermitsiaq allappoq, Ilageeqarnermut naalakkersuisoqarfik Danmarkimi palasimut allagaqarmat, palasi kalaallinik nammineq pisuussutiginagu Danmarkimiittariaqartunik taamaallaat sullissisalissasoq.
Taamani Biskoppiugallartup Isak Davidsenip oqaatigaa, palasip Danmarkimiittup kalaallinut Danmarkimi nunassissimasunut palasi Danmarkimiittoq naalagiartitsisussatut inissisimanikuunngitsoq.
Kisianni ilageeqarneq pillugu inatsimmi 2010-meersumi oqaaseqaatini allassimavoq kalaallit Danmarkimi palasiat kalaallinik Danmarkimi najugaqalersimasunik ilageeqarnikkut sullissisinnaasoq.
Biskoppi Sofie Petersen Inatsisini allassimasut malinneqarsimammata erseqqissaavoq, palasillu Jens Kristian Kleistip oqaloqatigineqarnissaralua taamaatinneqarnerarlugu.
- Sulinngiffeqarnerma nalaani pivoq, kisianni piumasaqaataalluni inatsisit eqquutsinneqarnissaat biskoppit isumagisussaagaat, tassa kalaallit namminneq piumassuserinngisaminnik Danmarkimiittut siulliullugit sullinneqarnissaat, Biskoppi Sofie Petersen oqarpoq.
Palasi Danmarkimi pisarnermisut qaammammut ataasiarluni Københavnimi naalagiartitsisarpoq. Kalaallisut ilisisarluni, katisitsilluni kuisitsillunilu. Taamaattumik pisut uippalliutaaleraluarput.
- Aningaasaliissutit sipporlugit atuinnginnissarput tunngavigalugu kaajallaasitaq allannguuteqartinneqarpoq. Danmarkimi palasi siornatigut nammineernerusaraluartoq massakkut Qeqqata Provstianit aqunneqarpoq, Biskoppi Sofie Petersen oqarpoq.
Danmarkimi palasip naalagiartitsisarnissaanik malittarisassami nutaami suli kalaallit Danmarkimiittut qaammammut ataasiarlutik suli naalagiartinneqartarnissaat allassimavoq, kisianni kalaallit danmarkimi nunassissimasut qaammammut ataasiarluni naalagiartitsinerup saniatigut katititsissagunik nunatsinni qeqqata provsteqarfianit akuerineqaqqaartariaqassapput.
Ilageeqarnermut ministereqarfiup iluani suleqatigiissitami sulisut kalaallit Danmarkimi najugaqalivissimasut pitsaanerusumik ilagiittut sullinneqarnissaat suliniutigingaat Sofie Petersen oqarpoq.
Danmarkimi palasi Jens Kristian Kleist, palaseqartitsineq pillugu KNR-imut oqaaseqarumanngilaq.
