Biskoppi: Oqaluffiit siarngi 13. decembarimi aamma sianertinneqarlik
Siarngit 350-eriarlutik sapaammi decembarip ulluisa 13-ianni kasunneqassapput, taamaalilluni nunarsuarmi ilagiit naalagaaffinni siuttunut nunarsuup paarilluarneqarnissaata pingaassusia oqariartuutigissallugu. Taamalu aamma CO2-mik aniatitsineq nunarsuarmi silap kiatsikkiartorneranut pissutaasoq iliuuseqarfigeqqullugu.
Nunatsinnimi qanoq pisoqassava? Biskop Sofie Petersen peqataaqqusilluni oqaluffeqarfinnut allagaqaqqammerpoq.
- Suu, kajumissaarutigalugu allagaqarnikuuvunga ilagiit sinniisaannut palaseqarfinnullu, sumiiffinnilu ataasiakkaani aalajangissavaat sianerusunneerlutik, Sofie Petersen oqarpoq.
Sianernissaq tapersersorpaa, pissutigalugu sapaatini ullunilu allani naalagiarnerni upperisamik nassuerutiginnittoqartarmat, Guuti ataataq pinngortitsisuusoq upperalugu.
- Uagut nammineq pinngoritamik paarseqataasutut inissisimavugut aammalu Kristumiussutsimi tullimut asanninnermut attuumalluinnartoq pingaartuummat. Tulleq sumiikkaluartorluunniit silap pissutsaata allanngorneranik eqqugaasoq aamma ikiorserniarsinnaagatsigu, nangippoq.
Politikkimut akuliunnertut isiginngilaa, naak nalunngikkaluarlugu Danmarkimi ilagiit ilaannit politikkimut akuliunnertut isummersorfigineqartoq.
- Uagut aamma pisussaaffigaarput aalajangiisussat eqeersarniassallugit immaqaluunniit sunnerniassallugit, biskoppi oqarpoq.
Københavnip Oqaluffissaarsuani Københavns Domkirke-mi decembarip ulluisa 13-ianni naalagiarnermut nunat tamalaat aallartitaat peqataassapput, aamma nunatta biskoppia.
- Naalagiarnissami siuttorpassuit najuunneranni uanga ujarak nunatsinninngaannneersoq tigummiarlugu qinnussissaanga. Aamma erinarsoqatigiit Aavaat naalagiarnermi tassani marlunnik atuissapput, nassuiaavoq.
Naalagiarnermi aamma Afrikamiunik nunanillu assigiinngitsorpassuarneeersunik najuuttoqassaaq. Pilersaarutaavoq naalagiarneq soraarpat nalunaaqutaq pingasunut siarnit sianertinneqalissasut.
- Nalunngilara Manerassuarmiit Svalbardimut oqaluffinni assigiinngitsorpassuarni sianertoqartussaasoq, Sofie Petersen naggasiivoq.
Biskop Sofie Petersen maanna Danmarkimiittoq aamma oqarpoq, pisussamut atatillugu Nuummi decembarip ulluisa aqqarnanni naalagiartoqassasoq.
Siarngit 350-eriarlutik kasunneqarnissaat pissuteqarpoq, kisitsit taanna gassit silaannarmik kissatsikkiartortitsiinnassanngippata qummut annerpaaffiattut 350 ppm taaneqartarmat. ppm tassaavoq "parts of a million CO2", CO2-p 350 millionerarterutaa.
