Biologi: Qaleralinniarnermut aqutsiveqarfiit allanngortinneqartariaqanngillat
Biologit isumaqarput Upernavimmi, Uummannami Qeqertarsuarmilu qaleralinniarnermi aqutsiveqarfinnik allannguinissaq pisariaqanngitsoq.
Sinerissap qanittuani qaleralinniarnermi Upernaviup, Uummannap Qeqertarsuullu aqutsiveqarfii allanngortinneqarnissaannut siunnersuut partiit tamarmik, Demokraatit minillugit, inatsimmi allannguinissamut siunnersuut tapersersorpaat.
Pinngortitaleriffimmi immikkoortortami pisortap Helle Siegstadip tamanna pisariaqanngitsoq oqaatigaa.
Pinngortitaleriffimmi biologit aalisagartassanut siunnersuutit saqqummiuppaat. Tassani aalisakkat assigiinngitsut marluk soqutiginerullugit saqqummiunneqarput. Tassa qaleralik saarullillu.
Sinerissap qanittuani sumiiffinni Qeqertarsuarmi, Uummannami Upernavimmilu qalerallit ukiut qulit ingerlanerini centimeterinik qulinik millisimasut, Pinngortitaleriffiup oqaatigaa.
Tunumili qaleralinnik pisassiinerunissaq siunnersuutigaat.
Sinerissalli avataani, sumiiffinni Tunumi, Islandimi Savalimmiunilu qaleralinnik peqassusseq pitsanngoriartuaalaartoq aamma oqaatigineqarpoq. Taamaalilluni aalisagartassat 2015-imi 25.000 tonsit pisarineqarnissaat innersuussutigineqarpoq. Ukiup siulianut naleqqiullugu procentinik 26-nik qaffanneqarlutik.
Saarulliit sinerissap qanittuaniittut amerliartorput, amerliartuaarnerallu ajunngitsumik ingerlasoq, Pinngortitaleriffimmit oqaatigineqarpoq. Tunumili saarulliit aalisarneqartariaqanngikkallartut oqaatigaat, saarulliit suffisarnissaannik periarfissiinissaq angorusunneqarmat.
Saarulliit sinerissap qanittuani aalisarneqarnissaanut tonsit 12.000-it pisassiisutigineqarnissaat siunnersuutigineqarpoq. Ukiup siulianut naleqqiullugu procentinik pingasunik amerlineqarlutik.
