Binzerip ataatsimiigiartukinnera pakatsissutigaa
Naammagittaalliorlutik atsiornerit tunniunneqarput, Air Greenlandip pisortaanera, Michael Binzer, Kujataani angalaleruttortoq. Innuttaasunilli atatsimiititsinerit ornigarneqarpianngillat.
Angalaneq Air Greenlandip akigititai angallassineralu pillugit ilisimatitsinissamik siunertaqarpoq, aammalu politikerit, suliffeqarfiit innuttaasullu qanoq siunnersuuteqarniarnersut allamillu oqaasissaqarnersut tusarniarneqarlutik.
Narsami, Qaqortumi Nanortalimmilu ataatsimiititsisoqaraangat inuit taamaallaat 25-it 30-ilu takkuttarsimapput. Naammagittaalliorlutillu atsiortut amerlassusaat eqqarsaatigigaanni, taama ikitsigisut takkuttarnerat Michael Binzerip tupigusuutigaa.
- Innuttaasunik ataatsimiititsisoqarnerani takkutinngitsooriarluni atsiuinnarluni isornartorsiuineq oqippallaartoq isumaqarpunga, Michael Binzer oqarpoq.
Taanna isumaqarpoq, inuit naammagittaalliortut, ilisimanagu, angallannikkut pissutsinut suut apeqqutaasarnersut
- Immaqaana kujaani angallannikkut pissutsinik ilisimasat mikisuararsuusut. Tassa Kujataani angallassineq pillugu sullissinermut isumaqatigiissutip qanoq aaqqissuussaneranik paasinninneq mikisuararsuuvoq, Michael Binzer oqarpoq.
Aammami Kujataamioqatimi Air Greenlandip pisortaanik toqqaannartumik oqaloqateqarusunnginnerannut, Kommune Kujallermi borgmesteri, Simon Simonsen, pakatsisimaarpoq.
- Air Greenlandip Kujataani sullissineranut naammagittaalliutit ikigisassaanngitsut saqqummertarput. Taamaammat tupigusuutigeqaara, inuttaa toqqarlugu apeqquteqarsinnaalluni, toqqavissumillu aamma akineqarsinaalluni, periarfissatsialassuaq innutaasunit annerusumik atorneqanngimmat.
Taamaalillunimi paasinninneq annerussagaluarpoq aammalu iluarsiissutissanik kissaatit tunngavilersuutillu amerlanerusut Air Greenlandimut apuunneqarsimassagaluarput. Tassalu pakatsinera ersersikkusuppara, Simon Simonsen oqarpoq.
Kujataani angallannikkut pissutsinut naammagittaalliorluni atsiortitsinermik aaqqissuisoq ajoraluartumik oqaaseqartissinnaasimanngilarput.
