Binzer: Paasisinnaanngikkunikku allamik suliffissarsiortariaqassapput

Sulisunik mattussineq pissaanermik takutitsinerunngitsoq, peqatigiiffinnillu unammillertuunani, suliffeqarfiulli annaanneqarnissaa anguniarlugu iliuusaasoq, Michael Binzer oqarpoq.

- Timmisartortartut amerlanerit nalunngilakka, ilaallu peroriartoqatiginikuullugit, taamaattumik una pisoq nuannerpallaanngilaq, pingaaruteqarnerusumilli anguniagaqarpunga. Suliffeqarfitsinni suliffissat assigiinngitsut siunissamut attatiinnarneqarnissaat anguniarpara, tamannalu anguniarlugu suliakkerneqarsimavunga. Maanna taamaallaat eqqarsaatigaara suleriuseq taanna atuinnarniarlugu, siunissami suliffissaqartuarnissaa eqqarsaatigalugu. Timmisartortartunut kinaassusersiunngilanga, pissutsilliuku maannakkut atugarisavut nutarterniarlugit taama iliuuseqartunga, Michael Binzer taama oqarpoq.

Timmisartortartut aningaasarsiaminnut Air Greenlandillu siunissaa pillugu iliuuserineqartut akuerineqarsinnaannginnerarlugit Michael Binzer paatsuugassaanngitsumik oqariartuuteqarpoq.

- Oqarusuppunga, suleriusissarput kialuunniit paasisinnaanngippagu, taava allamut suliffissarsirtariaqarput.

Air Greenlandimi pisortaaneq Michael Binzer taama oqarpoq. Aaqqiagiinngittoqarnera marlunnik ajornartorsiutitaqartoq oqaatigaa, tassa timmisartortartut timmisartumilu saqisut sulinerminnik mattussaanerat, taavalu Air Greenlandip aqutsisuiniit anguniarneqartut isumaqatigiinngissutaanerat.

- Tatiginassusermik takutitsinnginnermik una ersersitsineruvoq, tatiginninnerullu utertinneqarnissaa anguniarlugu suleqqilissaagut, aaqqiagiinnginnerli qaangiutereerpat tamanna aatsaat suliarisinnaavarput.