Binzer: Isumaqatigiinniarnerni ajugaasoqanngilaq
- Oqiliallannaqaaq, ingammik aasaanerani sulinngiffeqarlutik angalasussat eqqarsaatigalugit. Sullitat, sulinngiffeqarlutik angalaniarlutik ukiumi ilivitsumi pilersaarusiorsimasut, ilumut angalanissaannik qularnaarussinnaanagit erloqinarsimaqaaq. Taamaammat uannut oqiliallannaqaaq, Air Greenlandip pisortaanera Michael Binzer oqarpoq.
Isumaqatigiissaaniartartup Asbjørn Jensenip allaffiani susoqarsimaneranik, Michael Binzer oqaluttuarumanngilaq. Kisianni oqartoqarsinnaasorinngilaa, piginneqatigiiffiup timmisartunilu inuttat nukittuniunneranni ajugaasoqartoq.
- Kikkut ajugaasuunersut imaaliallaannarluni oqartoqarsinnaasorinngilara. Neriuppungami isumaqatigiissuteqarsimassasut illua tungeriilluta iluaqutigisinnaasatsinnik, pisortaaneq oqarpoq.
Timmisartuni inuttanut isumaqatigiissut aasaanerani sulinngiffeqalinngilaattaa timmisartuutileqatigiiffillu ulapinnialeruttortoq atorunnaarmat, sulisut isumaqatigiinniarnissamut aallaavigissaarnerummata pisortaanerup nassuerutigaa. Kisianni tamanna misiliigaluaramilluunniit allanngortissinnaasimanngilaat.
- Isumaqatigiinniartarnerit ukiuunerani pisarnissaat kissaatigigaluarpara, soorlu sulisut kattuffiinut allanut amerlanernut taama piumasaqartugut. Kisianni uani isumaqatigiissuteqarnitsinni allanngortinnissanut isumaqatigiissinnaasimanngilagut, Air Greenlandip pisortaanera Michael Binzer oqarpoq.
Timmisartuni inuttat siulittaasuat Ajaaja Kofoed ullup qeqqata siorna saaffiginiartaraluarparput iluatsinaguli.
Illua tungeriilli ataatsimoorussamik tusagassiutinut nalunaarput, inernerusoq tamarmik iluarisimaarlugu, taannalu ilaasortat akuersaassagaat timmisartuni inuttat siulittaasuta inassutiginiaraa.
Unnugu radioviisimi tusarneqarsinnaavoq ukiut pingasut kingulliit ingerlaneranni pingasoriarlutik timmisartuni inuttat timmisartortartullu Air Greenlandilu aaqqiagiinngissuteqartarsimanerat pillugug timmisartuutileqatigiiffiup pisortaanerata nassuiaanera.
