Biilit Toyotat ilaasa gaspedalii misissorneqassapput
Danmarkimi biilit Toyotameersut 32.000-t missaanniittut piginnittui Japanimiut biililiorfiata Toyota-p aggersarteriaannaavai, taakkununnga ilaapput Kalaallit Nunaanni biilisisimasut.
- Biilit Toyota-meersut Kalaallit Nunaanni tunisaanerpaapput, taamaattumik biilit misissorneqartussat sananeqarnerisa normuisa allattorsimaffii pigutsigik piginnittui attavigissavavut, Nuummi Godthåb Auto Servicemi pisortaq Ernst Jensen ilisimatitsivoq.
Nuummi biilit pineqartut ilaat nalunartut pillugit misissortarlugit aallartinneqareerput. Maannamullu gaspedalit misissukkat tamarmik ajoquteqarsimanngitsut oqaatigineqarpoq.
Toyota Danmark nittartakkamini erseqqissaavoq, biilit misissukkamik gaspedalia ajoquteqartoq paasigunikku ninngutsisarlugu suliarineqassasoq, suliarineralu 30 minutsit missaannik sivisussuseqassangatinneqarpoq.
- Paasineqarsimavoq biilit Toyotameersut ilaasa gaspedalii - biilimi isigassorluni sukkatsiisaatit - atorsinnaajunnaariartorlutik, allaat ilaasa gaspedalii ingerlaarnermi nikikkumajunnaarsinnaasartut, taama Toyota Danmarkimi tusagassiisartoq René Mouritsen oqarpoq.
- Kalaallit Nunaanni Toyotanik biilillit eqqissisarsinnaavagut, ataasinnguamilluunniit biilimik gaspedaliminik ajornartorsiuteqartumik suliaqarsimannginnatta. Ajornartorsiut USA-miinnaq biilini 16-ini maannamut maluginiarneqarsimavoq. Europamili maanilu nunatsinni naamik, Ernst Jensen oqarpoq.
Toyota Danmarkip nittartakkaminni www.toyota.dk atuisartutik pisumik malinnaatinniarpaat. Ilaatigut biilit sananeqarnerminni normuisa allattorsimaffiat ulluni qaninnerni takuneqarsinnaanngussalluni.
Toyotap biililiai pineqartut tassaapput Aygo, iQ, Yaris, Auris, Corolla, Verso, Avensis aamma RAV4. Nunatsinni Toyotameersunik tuniniaasuupput Sisimiut Auto-Service, Auto Go Qaqortoq aamma Nuummiittoq Godthåb Auto Service.
