Biilinik aallarussisut qimaariaraluartut

Sapaammi februaarip 19-ani unnuami nalunaaqautaq marlunut, inuusuttuaqqat pingasut biilinik aallarussisimasut Nuummi Eqalugalinnguani unitsinneqarput.
Allattoq Mads Pedersen
februaarip 21-at 2012 12:45

Siullermik biilinik aallarussisimasut Nuummi 400 metervejimi Nuussuup tungaanut ingerlasut Politiinit takuneqarput, unitseriarneqarlutillu. Biilinilli aallarussisut uninngimmata Nuussuarmi Eqalugalinnguit tungaanut malinneqarput unitsitaallutillu, Gert Kristiansen Nuup politiivini pigaartuusoq KNR-gl-imut paasissutissiivoq.

Biilinik aallarussisut inuusuttuaraapput, marluk 15-inik ukiullik ataaserlu 16-inik ukiulik. 18-nik inorlugit ukioqarmata meeqqanut inuusuttunullu pinaveersartitsinermik sulialik kiisalu pineqartut angajoqqaavi politeeqarfimmut aggersarneqarsimapput. Inuusuttuaqqat angajoqqaavilu oqaloqatigineqareermata iperagaasut, Gert Kristiansen nassuiaavoq.

Biilit aallarunneqartut inuinnaap biilerai. Biilit arfininngornermi tallimanut angerlarsimaffiup silataanut, Attartumi, inissinneqarput. Unnuallu ingerlanerani biilinik piginnittup malugilersimavaa biilit inissaminiinngitsut, tamannalu Politiinut nalunaarutigalugu.

Qanoq aallarunneqarsimanersut Politiit oqaatigisinnaanngilaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq