Big Bang iluatsippoq
Misileraaffimmi Cern-imi sananeqaatinik minnernik sukkalisaartitsisartoq, tassa partikelaccelerator-imik taaneqartartoq iluatsissimavoq. Sananeqaateeqqat protonit iluatsittumik sukkaqisumillu aportinneqarput. Siunertarineqarpoq nunarsuup pileqqaarnerani pissutsit qanoq issimanerisa paasiniarneqarnera.
- Fysik-imi ilisimatusarnermi nutaaliorneq imaannaanngitsoq pivoq. Tassa sekundimut pisut assigiinngitsut 40-t nalunaarsorpavut, tamannalu siulittuutigisimasatsitut pivoq, misileraanerup pisortaanerisa ilaat Fabiola Gianotti aviisumut The Guardianimut taama oqaluttuarpoq.
Misileraanerup kingorna ilisimatuut nakkutilliisarfimmi nuannattunnguupput.
Misileraanerup siunertaa tassaavoq, silarsuup pinngoqqaarnera paasiniassallugu, aamma paasiniarneqarpoq silarsuup 25 procentia sooq taggariinnarsuunersoq. Jyllands Postinip nittartagaa taama allappoq.
