Bidenip ministerissani siulliit marlunngorpat saqqummiutilerai
USA-p præsidentissaata Joe Bidenip naalakkersuisumini ministerissani siulliit marlunngornermi saqqummiutissavai.
Bidenip pisortaqarfimmi siuttussaa Ron Klain tv-kkut sapaatiummat apersorneqarami taama oqarpoq.
- Ministereqarfiit ministerillu kikkut eqqartorneqarnersut paasiniarussiuk præsidentinngortussap nammineerluni marlunngorpat nalunaaruteqarnissaa utaqqisariaqarparsi, Klain ABC News-imut taama oqarpoq.
AAMMA ATUARUK Bidenip ukiorpassuarni siunnersortini Ron Klain atorfilittat pisortassaattut toqqaraa
Bidenip ministerissani inuit assigiinngisitaartuunerannik ersersitsissasut siusinnerusukkut oqaatigaa.
Aningaasaqarnermullu ministerissaminik sapaatit akunnerata siuliani toqqaavoq.
- Toqqangara demokratit partiiannit tamanit siuarsaarusuttunit ingasattajaartuunngitsunillu akuersaarneqassasoq isumaqarpunga, Biden tusagassiortunut oqarpoq.
Bidenip centralbankip pisortaanerisimasaa Janet Yellin pissaaneqarfiulluartumut toqqassaneraa isumaliuutigineqarnikuuvoq.
Allallu centralbankip suleriaasianut attuumassutillit eqqaaneqarnikuullutik.
AAMMA ATUARUK Bidenip Georgiami ajugaanera uppernarsarneqartoq
Joe Bidenillu aallartitaq 58-inik ukiulik Antony Blinken nunanut allanut tunngasunut ministerinngortissallugu pilersaarutigigaa, tusarfiit tusagassiorfimmut Bloomberg Newsimut oqarput.
Antony Blinken præsidentip illorsuaani Barack Obamap præsidentiunerani sulereerpoq.
