Bidenip Georgiami ajugaanera uppernarsarneqartoq
USA-mi præsidentimut qinersinermut atatillugu naalagaaffimmi Georgiami kisitseqqinnerit naammassipput, Joe Bidenillu Georgiami ajugaasuunera uppernarsarneqarpoq.
Georgiami ministerit ilaata Brad Raffenspergerip, republikanerinneersup, tamanna ippassaq sisamanngornermi uppernarsarpaa.
Qineqqusaartut Trump Bidenilu Georgiami qinersinermi qanittuararsuummata kisitseqqittoqartussanngorpoq, taasinerillu 5 millionit missaat kiseqqinneqarlutik.
Joe Biden præsident Donald Trumpimut naleqqiullugu Georgiami 14.000-inik qinersiseqarnerusoq kisitseqqittoqannginnerup siuliani nalunaarutigineqarpoq.
Bidenip Georgiami ajugaanera Raffenspergerip ullumi tallimanngornermi pisortatigoortumik nalunaarutigissagaa naatsorsuutigineqarpoq.
Kukkunialunnguit paasineqarput
Bidenip Georgiami ajugaanerata ministerimit pisortatigoortunngortinneqarnissaa nalunaarutigineqareersorlu Biden Georgiami ajugaasutut nutaarsiassaqartitsivimmit AP-mit aamma nalunaarutigineqarpoq.
Ajugaasoq 0,5 procentpointit ataallugit ajugaasimappat ajorsartutut nalunaarutigineqartut kisitseqqittoqarnisssaanik piumasaqaateqarsinnaapput.
Georgiami nunap immikkoortuisa 159-it akornanni marluk, taasinernik kisitsinermi siullermi ilaatinneqarsimanngitsunik marlunngormat nassaarput. Taasinerilli taakku qinersinerup inerneranut sunniuteqanngillat.
Georgiami nunap immikkoortua Fayette assersuutigineqarpoq. Taasinerit 2755-it tassani ilaatinneqanngitsoorsimapput.
Taasinerit kukkusoqarneratigut qarasaasiamut nuunneqanngitsoorsimapput. Taasinerillu ataasiakkaarlugit kisinneqarmata Trump 1577-init taaguunneqarsimasoq paasineqarpoq, Bidenilu 1128-nit.
Donald Trumpip qinersinermi ajorsarnini suli nassuarutiginngilaa, qinersinermili peqquserluttuliortoqarneratigut ajorsarnini oqaatigiuaannarsimallugu, naak peqquserluttuliortoqarsimaneranik takussutissaqanngitsoq.
USA-mi tusagassiorfiit oqaatigaat Joe Biden ajugaanermii qinersisartut sinnerlugit taasisartunik, tassa valgmændinik, 306-inik pissarsisimasoq, Donald Trumpilu 232-nik pissarsisimasoq.
/ritzau/Reuters
