Biden Ukraine pillugu Putinimut mianersoqqussuteqaqqittoq

USA-p præsidentia Joe Biden russit præsidentiannik Vladimir Putinimik oqarasuaatikkut akunnerup ataatsip miissaanik oqaloqateqarnermini, Rusland Ukrainemut iserluni tiguaaniarnera USA-p isiginnaaginnarniarnagu Biden aarlerisaarivoq.

Russit sakkutuui 100.000-nik sinneqartut Ukrainep killeqarfiata eqqaaniipput, Natollu ernummatigaa, sakkutoorpassui taakkua killeqarfik qaangerlugu Ukrainemut isaassasut.

Biden Putinimik oqaloqateqarnermini aamma oqarpoq, Rusland Ukrainemik tiguaassagaluarpat USA akilluni aalajangeeriataarsinnaasoq tamanna Ruslandimut annertuumik kinguneqartussamik.

Bidenip aamma qulakkeerlugu oqaatigaa, USA illersoqatigisanik suleqatigisanilllu aallartitatigut iliuuseqassasoq, qanorluunniit pisoqassagaluarpat piareersimaniarluni.

AAMMA ATUARUK USA: Russit Ukrainemik tiguaariaannaapput

USA-mi præsidentip illorsuani atorfilik nutaarsiassaqartisivimmit Reutersimit issuarneqarpoq, Bidenip Putinillu oqarasuaatikkut ataatsimiinnerat pissutsinut maannakkut atuuttunut tunngaviusumik allannguuteqanngitsoq.

Rusland Ukrainemut iserluni tiguaanianngitsoq Putinip oqaatigaa.

Russilli Ukrainep Natomut ilaasortanngunngisaannarnissaanik piumasaqartut erseqqissaatigaa.

Ukrainemiulli namminneq tamanna aalajangigassarigaat, Natomit oqarput.

AAMMA ATUARUK Ukraine eqqisseqatigiikkusuppoq