USA: Russit Ukrainemik tiguaariaannaapput
Amerikamiut nunanut allanut ministeriat Anthony Blinken oqarpoq, “Russit Ukrainemut nunamik tiguaaniarnerat” sukkulluunniit aallarterataannaasoq, naak aamma ukiuunerani OL-ertoqaraluarpalluunniit, maannami russit sakkutuui nutaat allat Ukrainep killeqarfianut aamma annguppallapput.
Siusinnerusukkut oqartoqaraluarpoq, Moskva Kinamut illersuisuusoq Kinamut akornusersuiumanani Beijingimi ukiuunerani OL-ertoqarnerata naammasseqqaarnissaa Ukrainemik tiguaasoqarnissaanut utaqqissunneqarsinnaasoq, taamaattoqanngitsorli Blinkenimit maanna oqaatigineqarpoq.
LÆS OGSÅ Ukraine eqqisseqatigiikkusuppoq
– Massakkut imaappoq sukkulluunniit tiguaaniarneq aallarteriaannaasoq erseqqissarlugulu: Aamma OL-ip nalaani, Blinken oqarpoq.
Amerikamiutut innuttaassusillit nuna qimattariaqarpaat
Taanna erseqqissaavoq USA ”sapinngisani tamaat atorlugu sakkortunerpaamik Ruslandimik aaqqiagiinngissuteqarnermut oqimaaqatigiissitsisumik aaqqiiniarsariagaluartoq”.
- Sapinngisarput tamaat atorlugu Ruslandimik isumaqatiginninniaraluarpugut, kisianni ilutigalugu aarlerisaarinermik illersornissamillu erseqqilluinnartuliorpugut. Tassalu Ruslandimut erseqqissaavugut saassussineq nutaaq toqqarpassuk annertoorujussuarmik inguneqassasoq.
AAMMA ATUARUK USA russit Ukrainemut saassussigaluarpata Ukrainemut sakkutigut tapersiiniartoq
Blinken aamma Ukrainemi pissutsit pillugit aarlerisaarivoq, præsidentilu Joe Bidenip amerikamiut Ukrainemiittut tamaasa kajumissaarpai piaarnerpaamik nuna qimassagaat.
- Amerikamiutut innuttaassusillit massakkut Ukrainemit aallartariaqarput, NBC News-imut Biden taama oqaaseqarpoq.
- Nunarsuarmi sakkutooqarnitsigut pissaaneqarnerpaat ilaat illuatungeraavut, kisianni ilungersunartorujussuarmut maanna killippugut, pisullu sukkasoorujussuarmik sakkortoorujussuarmillu allanngoriataarsinnaapput, amerikamiut præsidentiat taama oqarpoq.