Biden Georgiami 917-inik taaguunneqarnerulluni siuttuusoq

Donald Trump præsidentinngorniunnermilu unammillertaa, Joe Biden Georgiami naligiilluinnangajavipput.

Nutaarsiassaqartitsiviup AP-p tutsuiginarnerpaanik missingersuisartutut tusagassiuuterpassuarnit isigineqartup kisitsisaataasa tamanna takutippaat.

Demokraatininngaanneersoq præsidentitut qineqqusaartoq, Joe Biden præsidentimit republikanerininngaanneersumit Donald Trumpimit Georgiami maannamut kisitsinermi taaguunneqarnerulerpoq.

Biden taaguussinernik 917-inik nunatsinni nalunaaqutaq malillugu arferngup missaani siuarpoq.

Taaguussinerit 99 procentii maannamut kisinneqarsimasut amerikamiut tusagassiutaat NPR taama allappoq.

Præsidentinngorniuttut marluk Georgiami taaguussinernik maannamut kisitsinerit naapertorlugit 49,4 procentinit taaguunneqarsimapput.

Trump Bidenimit 14.000-inik taaguunneqarnerulluni sisamanngornermi unnukkut siuttuuvoq.

AAMMA ATUARUK Bidenip ajugaanissaa ilimanarluinnartoq missingersuutini ersertoq

Tusagassiuutip NPR-ip inerniliuppaa, præsidentinngorniuttut naligiittorujussuunerat pissutigalugu NPR-imit, AP-mit USA-milu tv-qarfinnit Georgiami ajugaasumik nalunaaruteqartoqarsinnaanngitsoq.

Qinersinerup Georgiami inernera Georgiamit novembarip 20-ani uppernarsarneqarumaartut, NPR allappoq.

Georgiami taasinerit 7000-t missaat The New York Times naapertorlugu suli kisinneqanngillat.

Qinersisut sinnerlugit taasisussanit 270-nit taaguunneqartoq præsidentinngussaaq. AP-p missingersuutai naapertorlugit Donald Trump 214-init maannamut taaguunneqarpoq.

AP-p missingersuutai ilumoorpata, Bidenip præsidentinngornissamut naalagaaffiit ilaanni ajugaanissani amigaatigiinnarpaa.