Bidenip ajugaanissaa ilimanarluinnartoq missingersuutini ersertoq
USA-mi præsidentimut qinersinermi inernerit utaqqineqartuarsinnarput.
Demokratit qinigassanngortitaata Joe Bidenip, inernerit missingersuutillu kingulliit naapertorlugit præsidentitut qinigaanissaa ilimanarluinnartoq nutaarsiassaqartitsiviup AP-p allaaseraa.
AP-p allaaserisaa naapertorlugu Joe Biden qinersisartut sinnerlugit taasisartunik 264-inik maannamut pissarsisimavoq.
Præsidentitut qinigaaniaraanni taasisartunik 270-inik pissarsoqartariaqarpoq. Donald Trump taasisartunik 214-inik pissarsisimasoq AP allappoq.
Biden naalagaaffimmi Arizonami ajugaasoq, nutaarsiassaqartitsiviit AP Fox Newsilu allapput, nutaarsiassaqartitsiviit allat Bidenip ajugaasimaneranik nalunaarutiginninnissartik suli tunuarsimaarutigaat.
AAMMA ATUARUK ATAATSIMUT ISIGALUGU: Biden suli siuttuuvoq - Trumpili qinersinermi naligiiffiusartuni pingaaruteqartuni ajugaasoq
AP-p missingersuutai eqquutissappata Joe Bidenip naalagaaffinni sinneruttuni ataatsimi marlunniluunniit ajugaanissani pisariaqartippaa.
Naalagaaffik Nevada taakkununnga ilaavoq, Bidenip præsidentitut qinigaanissaanut pingaaruteqarluinnartoq.
Taasinerit sisamararterutaasa missaasa kisinneqarnissaat tassani suli amigaataavoq. Biden Trumpimut naleqqiullugu 8000-it missaannit tassani taaguunneqarnerusimavoq, suli qanittuaraallutik.
Donald Trump præsidentitut qinigaaniaruni naalagaaffinni sinneruttuni tamangajanni ajugaasariaqassaaq.
Naalagaafffinni naligiiffioqisuni maannamut inernerit Trumpip naammagittaalliuutigisimavai, kisitsinerit unitsinneqarnissaat piumasarinngikkuniuk kisitsisoqaqqinnissaa piumasaralugu.
Biden præsidentitut qinigaanissamut ippassaq unnukkut qanilleriarujussuarpoq, naalagaafffimmi naligiiffiusorujussuarmi Michiganimi ajugaasoq nutaarsiassaqartitsiviup missingersuutaani takuneqarsinnaammat. Michiganimi qinersisartut sinnerlugit taasisartut 16-iupput.