Bibi takutitsinissarsuarmut ulapaarpoq
- Kingullermik takutitsillualaavippugut eqqartorluarneqarlutalu, taamalu pitsaatigisumik manana naammassiniagassaqalerpugut. Tamaviaarpugut, Bibi Chemnitz oqarpoq.
Taanna atisanik takutitsinersuarmi tassani ukiormanna februaarip qaammataani ilaagami kalaallini siullerpaavoq. Københavnillu kommuniata allaffeqarfissuani avatangiisini pilerineqartuni ukioq manna saqqummersitsisoqarnissaani peqataanermigut atisaliortutut Nunatsinni pitsaanerpaanut ilaalluni ersersippaa.
- Pisussaq angivoq. Angineroqqissinnaangingajappoq, mutinik atisaliortartoq oqarpoq.
Atisat, aappaagu ukiakkut tuniniagassanngortussat, Bibi Chemnitzip maanna saqqummersitassarai. Atisat mutit ataatsimoortut, siuliinit "street"-iunerusutut inuttaata taavai. mutiliortartorlu maanna ulapputeqaqaaq:
- Titusindilikkanik angumerisassaqarpunga. Atisanik takutitsisartoq massakkorpiaq pinnersagassaavoq. Suleqatiga David aamma takutitsisartumik allamik massakkut naapitaqarpoq, Bibi Chemnitz oqarpoq.
Atisanik ilusilersuisartoq ulapaartoq Martine Lind Krebsip oqaloqatigaa. Bibi Chemnitzip saniatigut Isaksen Design aamma Great Greenland mutinik saqqummersitsinermi peqataassapput - kingulleq Benedikte Utzonip atisaliaanik saqummersitsilluni.
