Inissianut atatillugu suliaq Kommuninut Nakkutilliisoqarfiup suliareqqissavaa
Kommuneqarfik Sermersuup inissaqartitsiniarluni aaqqissuussinera pillugu aaqqiagiinngissummi pisussat nutaat immaqalu aalajangiisuusussat qaammatip tulliani inississinnaagunarput.
Kommuninut Nakkutilliisoqarfiup najugassaqartitsinermik suliaq novembarip qulingiluaani suliareqqissagaa Nakkutilliisoqarfiup allattoqarfiata KNR-imut uppernarsarpaa. Kommunip illuliortitertut nammersortut illuliaannik attartornissamik isumaqatigiissutaa inatsisinut naapertuunersut, suliami uani apeqqutaavoq.
Illorsuit katillugit 416-inik inissiartallit matumani pineqarput.
AAMMA ATUARUK Kommunit Nakkutilliisoqarfiata Sermersooq inissianik attartortitseqqiisarunnaarallartikkaa
Suliaq taanna nakkutilliisoqarfiup siorna novembarimi siullermeerlugu suliaraa.
Nakkutilliisoqarfiup Kommuneqarfik Sermersuup illuliortitertunut namminersortunut inissianik, inissiatut attartortakkatut attartorteqqinniarlugit, attartornissamut isumaqatigiissusiortarnera taamani taamaatitsippaa.
Kommuneqarfik Sermersooq inatsisinut naapertuutinngitsumik iliuuseqanngitsoq, borgmester Charlotte Ludvigsen taamani akivoq.
Sivisuumik isumaqatigiinnginneq
Kommunit Nakkutilliisoqarfiat pillugu paasissutissat
Suliamik Kommunit Nakkutilliisoqarfiannut ingerlatitseqqiinissamut naammattunik tunngavissaqarnersoq, Naalakkersuisut aalajangigassaraat.
Kommunit Nakkutilliisoqarfiata nunatsinni kommunalbestyrelsit nakkutigisarpai.
Tassani ilaasortat tallimaapput. Savalimmiuni Ombudsmandi, Sólja í Ólavstovu, siulittaasuuvoq.
Kommunit Nakkutilliisoqarfiata kommunalbestyrelsip, aningaasaqarnermut ataatsimiititaliap ataatsimiititalialluunniit allap suliamut attuumassutillip aalajangernera inatsisinik unioqqutitsiffiusimappat atorunnaarsissinnaavaa.
Kommunit Nakkutilliisoqarfiata kommunimi aalajangigaq suliaritillugu atorunnaarallarsissinnaavaa.
Kommuneqarfik Sermersoorlu namminersortut inissiaataannik innuttaasunut attartortitseqqiisarunnaarallartitaavoq.
Namminersorlutik Oqartussat Nunamut Namminermut Immikkoortortaqarfiat kommuninik nakkutiginnittuullunilu Kommunit Nakkutilliisoqarfiannut allattoqarfiuvoq.
Tusarfik: Aqutsinermut inatsit
Kommuni Namminersorlutilli Oqartussat 2019-imili aaqqiagiinngilerput, ilua tungeriillu suliaq eqqartuussissuserisuminnut suliaritippaat.
Inatsit unioqqutinneqarnersoq kommunilu aningaasaqarnikkut illersorneqarsinnaasumik iliornersoq isumaqatigiinngissutigaat.
2015-imili Nuummi inissaaleqineq iliuuseqarfiginiarlugu, aningaasaliisartunit namminersortunit inissianik attartortarnikuuvoq.
Sanartortartunulli namminersortunut kommunip akiliutigisaratagai, inissiani najugallit akiliutaannit qaffasinnerupput. Taamaammat, init taakkua attartorneranni kommune matussutissiisarluni.
Namminersorlutik Oqartussat nunamut namminermut immikkoortortaqarfiata 2020-mi februaarimi attartornissamut isumaqatigiissutit tamakkua naapertorlugit, amigartoornissat kommunemit qulakkeerneqartarneri unitseqquai.
Siorna oktobarimi taava suliassaq Naalakkersuisut Kommunit Nakkutilliisoqarfiannut ingerlateqqippaa, tassanilu tamanna atorneqarunnaartussanngortinneqarluni.
Nakkutilliisoqarfimmi ilaasortat tallimat
Taamatullu aaqqissuussamik atorneqarunnaartussanngortitsineq suli atuuppoq.
Piffissap ingerlanerani Namminersorlutik Oqartussat suliffeqarfimmik avataaneersumik misissuitinneqalerput, Taakkuali kikkuuneri KNR-imut isertuunneqarput.
Nakkutilliisoqarfik tallimanik ilaasortaqarpoq. Siulittaasoq ateqarpoq Sólja í Ólavstovu, Savalimmiunilu Ombudsmand-iulluni.
Ilaasortat sinneri sisamat Inatsisartut kommunellu toqqagaraat. Inuit Ataqatigiinniit marluk kiisalu Siumumiit marluk.
Nakkutilliisoqarfiup allattoqarfiata KNR-imut nalunaarutigaa, Siumumeersoq Doris J. Jensen kiisalu Marianne Jensen IA-meersoq Inatsisartut toqqarsimagaat. Kommunet toqqagaat tassaapput Evelyn Frederiksen, Qeqqataa Kommuneani Siumut sinnerlugu kommunalbestyrelsemi ilaasortaq kiisalu Juaaka Lyberth, IA sinnerlugu Kommuneqarfik Sermersuumi kommunalbestyrelsemi ilaasortaq.
Suliassamulli atatillugu suliassami Kommuneqarfik Sermersooq pineqarmat, Juaaka Lyberth taasisinnaatitaanngilaq.
Taamaammat Kommune Kujallermi IA-meersoq, Naja Lund, paarlattaassaaq.
AAMMA ATUARUK Namminersorlutik Oqartussat Kommuneqarfik Sermersuullu inissianik attartortitseqqiisarneq saqitsaatigigaat
Nakkutilliiviup allattoqarfia suliaq pillugu oqaaseqarusunngikkallarpoq.
Nakkutilliisoqarfimmi ingerlatsinermut ileqqussaq naapertorlugu amerlanerussuteqartut aalajangiisarput. Taasisut naligiippara, siulittaasup taasinera aalajangiisuussaaq.
