Per Berthelsen politikkikkut oqaaseqartartussatut toqqarneqarpoq
Per Berthelsen naalakkersuisorlu Vittus Qujaukitsoq assortuussuteqarsimapput, ilaatigut Qujaukitsup inatsisartunut ilaasortanngoqqinniarluni taamaatullu Berthelsenip ilaasortaaffianik arsaarniarlugu sioorasaarsimallugu, isumaqatigiinnginnerilli tamakku Per Berthelsenip qaangereersimavai.
-Politikkikkut oqaaseqartartutut toqqagaaninni tatigineqarninnik takutitsivigineqarnera nuannaarutigeqaara. Ullut marlussuit eqqarsaatigilluareerlugu ullaap tungaani aatsaat akuersivunga. Politikkerput pillugu ersarissumik oqariartuuteqartarlunga partiitta avammut kiinnertarnissaata qulakkeerniarnissaa qilanaarivara, Per Berthelsen knr.gl-imut oqarpoq.
Per Berthelsenip politikkikkut oqaaseqartartuunerata saniatigut Siumup ataatsimiititaliani ilaasortai susassaqarfimminnut tunngatillugu oqaaseqartuussapput.
-Inatsisartuni ilaasortatut atorfiit qullasinnersaraat, politikkikkullu misilittakkakka tamaasa atorlugit partiip isumassarsiai isumaalu nunaqqatitsinnut apuunnissaat qulakkeerniarlugu sulissaanga. Nunatta siunissaa qularnaarniarlugu sulisuvugut, tamannalu peqataaffiginiarlugu ulloq unnuarlu sulissaanga, Siumup politikkikkut oqaaseqartartortaava oqarpoq.