Berniep assinga millionilikkaanik ajunngitsuliornermut atugassanik isertitaqaataasinnaasoq
USA-mi demokratit sinnerlugit senatorip Bernie Sandersip, Joe Bidenip præsidentitut ivertinneqarnerani isumalorujulluni, qanermut assiaquserluni nuersakkanillu aaqqasersimalluni assinga, suliniaqatigiiffinnut ajunngitsuliornermut tunngasunut aningaasarsiutaalluarsinnaavoq.
Asseq pineqartoq allanngortinneqaqattaarluni inoqatinut attaveqaatini assigiinngitsuni nunarsuaq tamakkerlugu saqqummersinneqaqattaarlunilu quiasuutigineqarpoq.
Asseq allanngortinneqarsimalluni nunani tamalaani oqaluttuarisaanermi pisimasuni ilaatinneqartuusaartinneqaqattaarpoq.
AAMMA ATUARUK Bernie Sandersip Joe Biden præsidentimut qinersinissamut tapersersoraa
Bernie Sandersip assinga allanngortinneqarsimasoq, Sandersip nammineq quiasuutigigini nutaarsiassaqartitsivimmut CNN-imut oqarpoq.
Assillu amerikamiunut ikiorserneqarnissamik pisariaqartitsisunut iluaqutaasinnaanera inuttaata nammineq aamma nuannaarutigeqaa.
- Asseq quiasuutigiinnarnagu maani Vermontimi tujuulunik tujuuluaqqanillu tuniniaallualerpugut, Sanders nassuiaavoq.
Aningaasat tujuulunik tujuuluaqqanillu tuniniaanermi isertitat millionilikkaajunissaat Bernie Sandersip naatsorsuutigaa, suliniaqatigiiffimmullu utoqqarnut isertitakitsunut nerisassaqartitsinermik suliniuteqartumut tunniunneqarnissaat ingerlateqqinneqarnissaat pilersaarutigalugu.