Berlingske Business Danmarkimi tusagassiuutit pillugit aalajangiisartunut KNI-mit naammagittaaliutigineqarpoq
Tusagassiuutit pillugit aalajangiisartunut, tugasassiornermi ileqqorissaarnermut apeqqutinik aammalu tusagassiorfiit allaaserisanut naammagittaalliuutinik saqqummiussiumannginnerannik naammagittaalliuutinik Danmarkimi suliaqartuusunut naammagittaalliuummik, KNI-p eqqartuussissuserisua Malling & Hansen Damm suliarinnittuuvoq.
Tusagassiornermi akisussaaffiit pillugit inatsimmi tusagassiornermi ileqqorissaarnissaq pillugu malittarisassat unioqqutinneqarsimappata, Tusagassiuutit pillugit aalajangiisartut tusagassiuutinik isornartorsiuisinnaatitaapput, aammalu allaaserisanut naammagittaalliuutinik suliani aalajangiisartut aalajanginnerannik tusagassiuutit saqqummiussinissaannik naalakkiisinnaatitaallutik.
Tusagassiuutit pillugit aalajangiisartut pillaasinnaatitaanatillu taarsiissuteqaqqusisinnaanngillat, aammalu inuit, suliniaqatigiiffiit imaluunniit inuussutissarsiornermik suliffeqarfiit eqqunngitsuliorfigineqartut aningaasatigut sutigulluunniit taarsiivigineqarnissaannik qulakkeerisinnaatitaanatik.
KNI-p tusagassiorfinnut nalunaarutimi innersuussutigaa suliffeqarfissuup soraarsitsinermut atatillugu kukkunersuisut nalunaarusiaannik inatsisitigullu naliliinermik saqqummiussiniarluni aalajangersimammat, suliap tusagassiuutinit sammineqarnerata tunngaveqarluartumik ingerlanneqarnissaa siunertaralugu.
- Berlingske Businessili suliamik sammisaqarnermini ilumoortoq killormut saatinniarlugu kukkunersiuisut nalunaarusiaannit inatsisitigullu naliliinermit paasissutissat ilaannakortumik saqqummiussimavai, tusagassiorfinnut nalunaarummi eqqartuussissuserisumit Niels Hansen-Dammimit suliarineqarsimasumi taama toqqaannartumik allassimavoq. Aammattaaq tusagassiorfiit arlallit isorisaqaratik Berlingske Businessip suliaanik qarsupittumik tupaallannartuleriniarneranillu ingerlatitseqqiisarsimanerat aamma eqqaavaa.
Aammattaaq peqquserluttuliortarnerup pinaveersaartinnissaanik suliniaqatigiiffimmut Transparancy Greenlandimut kaammattuutigaa, Berlingske Businessip allaaserisaanik isorisaqarani Facebookimi quppernermini innersuussisimanermitulli naammagittaalliuut saqqummiuteqqullugu.
Danmarkimi Tusagassiuutit pillugit aalajangiisartut naammagittaalliuut qaqugu aalajangiiffigissaneraat allassimanngilaq, Aalajangiisartulli ukiumut aqqaneq-marloriarlutik ataatsimiittarput.
