Bendt Frederiksen toquvoq
Bendt Frederiksen landrådemut 1975-mi qinigaavoq, Inatsisartunut Siumut sinnerlugu 1979 qinigaaqqippoq, 1991-miillu 1995-ip tungaanut Inatsisartuni issiaviit ataqqinarnerpaartaat issiavigalugu siulittaasuulluni.
- Angut nukittooq, ataatsimoortitsilluarsinnaasoq nunaqqatiminullu uummateqarluni sullissiumatooq tassanngaannartumik toqukkut qimaguppoq. Nunatta angutitaasa ataqqinartut ilagilluinnarpaat, sulinermini nunaqqatimi ajunnginnerpaamik atugaqarnissaat angujumallugu sullissisilluarsimasoq aammalu tunniusimasoq akornatsinniikkunnaarpoq.
Taama eqqaaniaalluni ilaatigut allappoq Siumup siulittaasua, Aleqa Hammond nangilluni ima allalluni.
- Bendt Frederiksen, tassaavoq angut aalisarnermik piniarnermillu inuussutissarsiuteqarnermini sikorsuaq imarsuarlu angallavigalugu inuusoq. Bendt Frederiksen Inatsisartuni siulittaasuunermini pingaartilluinarsimavaa Inatsisartut ataatsimiinnerini partiit arlaannaalluunniit salliutinnagit naligiimmik isummersorsinnaanissaat angujumallugu aqutsinissaq, tamannalu Bendt Frederiksenip ataqqinaatigaa angisooq. Qujavugut nunaqqatigisimagatsigu aammalu qujaqaagut suleqatigisimagatsigu.
Siumup siulittaasua, Aleqa Hammond tusagassiutinut nalunaarummini taama allappoq.
Bendt Frederiksen politikkikkut suliaqarunnaarnermi kingorna toqussi tikillugu aalisartutut piniartutullu Upernavimmi eqqaanilu inuuvoq.
Inatsisartut siulittaasuata, Josef Motzfeldtip Bendt Frederiksen aamma eqqaaniarpaa, oqarluni Bendt Frederiksen tassaasoq Nunatta oqaluttuarisaanerani nutaajunerusumi innuttaasut qinigaanni nuimasut sunniuteqagaarsimasullu ilaat.
- Inatsisartuni sulinermini, Bendt Frederiksenip pingaartilluinnagaraa inatsisiliortutut suliassat misigissutsit qalliinnakkorsiortut atorlugit suliassaanngitsut, Josef Motzfeldt allappoq nangillunilu.
- Inoqamminut mianerinnittuuvoq, allat isumaannik naalaarsinnaasoq aammali isummaminik ersarissunik illersuisinnaasoq. Taammaannerata pilersippaa sulisunit qinikkatullu peqatiminit ataqqisaasoq. Josef Motzfeldt eqqaaniaanermini ilaatigut taama allappoq.
