Bendt B. Inuit Ataqatigiit: Akissaatiginnerusut akileraarnerulerlik
- Naligiissaarinermi akileraarutit eqqartorneqarnissaa piffissanngorpoq, ilaatigut periutsit tamakku misissorlugit sukumiisumillu nalilersorlugit, atuutsinneqartariaqalinnginnersut misissorneqartariaqalerluni, Bendt B. Kristiansen oqarpoq.
Kommunini akileraarut ataaseq akissaatikinnerusunut akissaateqarnerusunullu assigiimmik ullumikkut annertussuseqarpoq. Taama pissuseqartoqartillugu, kommunit arlaat kommuninut allanut annertunerusumik akiliisariaqartarpoq, tamannalu kommunini innuttaasunut pinngitsoorani tuttarluni.
- Assigiimmik akileraaruteqartitsineq kommunini innuttaasunut tamanut tuttarpoq allaat akissaatikinnerusut artukkerneqartarlutik. Akileraarutip innuttaasunut tamanut assigiinnera, ullutsinnut naleqqukkunnaarsimavoq! Bendt B. Kristiansen oqarpoq.
AAMMA ATUARUK Kommunit aningaasaqarnerannik naligiissaarineq paasiuminarsarlugu
Bendt B. Kristiansen Nunatsinni innuttaasut akornanni akissarsiarissaartutut oqaatigineqarsinnaavoq. Aperaarpullu nammineq ajorissannginneraa, akissaatikinnerusunut naleqqiulluni qaffasinnermik akileraartalernissani, taannalu ima akivoq.
- Aap taamaattariaqarpunga. Siunissami Nunatta aningaasaqarnera ajalusooraluttuinnassanngippat akissaqarnerusut akiliinerusariaqarput. Taamaaliunngikkutta pisortatigut aningaasartuutitta qaffakkiartuinnarnerat matussuserniarneqarsinnaanngimmat.
Bendt B. Kristaiansen aamma isumaqarpoq, naligiissaarinermi akileraarutip nutaamik ilusilersornerani akissarsiaqqortusiartorneq malillugu akileraarnerusalertoqassappat, kommunini akissaatikinnerusut akiliinerunnginnissaat qulakkeerneqassasoq.